The content originally appeared on:
Diario
Luenne Gomez-Pieters, Directora di DIMP:
ORANJESTAD (AAN): Directora di Departamento di Impuesto, Luenne Gomez-Pieters a duna di conoce cu e contribuyentenan mester ta atento pa loke ta e siguiente pasonan pa loke ta cobransanan fiscal.
Esaki ta e cobransa di grondbelasting cu ta bay sali fin di mei. E fecha cu e cobrasa lo sali ta dia 31 di mei 2024. E cobransa aki ta sali tur aña y e contribuyentenan ta custumbra cu ne, a bisa.
Esaki ta pa tur contribuyente cu ta doño di un propiedad inmobil.
Gomez-Pieters a splica cu kier corda e contribuyentenan cu tin un ‘meldingsplicht’ poni den ley desde 2019 caminda cu lo mester registra un propiedad. Un propiedad cu no ta registra mester wordo registra.
Riba e website di DIMP tin un formulario digital special pa registra un propiedad of cambio den e propiedad. Si tin un cas y a dicidi di haci un ‘bijbouw’, pone un pool of traha algo mas grandi patras cu un gazebo, etc, esey tin un balor agrega pasobra e propiedad ta subi di balor, e directora di DIMP a indica.
Pa DIMP asesora esaki ta importante pa meld. Ta berdad cu niun hende kier paga impuesto, pero pa grondbelasting tin tarifanan asigna pa cada balor di propiedad. No ta asina cu ta drenta den un tarifa maximo. Entre mas halto e balor di e propiedad mas belasting ta paga. Pero si tin un cambio no kiermen cu lo tin un cambio drastico den e suma di cobransa, a agrega.
E fechanan di pago pa cu grondbelasting ta un termino cu lo bin ariba e cobransa. E contribuyentenan por mira esaki despues cu e cobransa sali. E prome dos terminonan di pago ta vence dia 30 di juni 2024 (50% di e suma di cobransa). E di tres termino di pago ta 30 di september 2024 (25% di e suma di cobransa) y e cuater termino di pago ta 3 di januari 2025 (25% di e suma di cobransa).
