The content originally appeared on:
Diario
Pueblo lo sigui e caso di cerca
ORANJESTAD (AAN): Publico tabata sin consuelo na fin di luna di Maart, ora cu a bin haya sa cu un persona local na forma increible a abusa di un cacho chikito cu e nomber ‘Khaleesi’. Instancinaan pa proteccion di animal a drenta den accion, y a rescata e cacho cu tabata mara demasiado preta pafo, mientras ta criando su puppies. A core hibe veterinario, y aunke a haci nan best, e pober cacho no a sobrevivi.
E prome biaha cu DIARIO a haya sa di e caso, ta ora cu Ministerio di Transporte, Integridad, Naturalesa, y Cuido di Anciano (TINO) cu ta cay bao di Minister Ursell Arends a bati alarma riba un situacion di Abuso Extremo di mascota cu a worde detecta na Aruba.
Un pober cacho di rasa Chihuahua kende recien a caba di werp varios puppies, a worde mara pafo di cas cu cadena rond di su curpa comosifuera ta un animal peligroso di atake e ta. Asina pa basta siman, e cacho tefi aki cu e nomber “Khaleesi” a keda mara y habitantenan eybanda na San Barbola a cuminsa bati alarma na instancianan cu ta proteha cacho. Esaki a yega na oido di e.o. Luna Foundation, cu a purba papia cu e doño pero e no kier razona.
Finalmente den e ultimo siman di Maart, ta e grupo respeta di ‘Crijojo Trappers’ a yega y no por a kere nan wowo. Nan a graba un video ora cu nan a bay corta e cadena y cabuya y por a mira cu e animal hopi debil ainda tabata dunando lechi na puppies.
E cadena y cabuya aki tabata asina fuerte mara rond di su nek, te cu esaki a cuminsa literalmente “corta” den cuero di e animal, y esaki a cuminsa habri na herida cu carni bibo te cu por a mira su weso. Tabatin señal di infeccion fuerte caba, y mas señal di maltrato. E potretnan ta indica e gravedad di e heridanan rond di su nek. Ta comosifuera cu djis un tiki mas, y e cabuya y cadenanan aki a decapita e animal.
Cu yudansa di Luna Foundation, a core hiba e pober cacho aki pa Veterinario Contreras cu mesora a cuminsa pa haci e herida limpi, duna antibiotica, y duna tratamento. Luna Foundation na su turno a cuminsa cuida pa e puppies pa sigui ricibi alimento necesario.
Ora cu e informacion a cuminsa circula, ta hopi hende a keda biba di cerca e miseria cu e cacho chikito aki tabata pasa aden. A logra di trata e heridanan na su nek y demas parti di su curpa, pero e cacho tabata basta debil. A cuminsa yude den e proceso di recuperacion, aunke su estado tabata critico.
Asina fin di siman a drenta, y keto bay e tabata recuperando y tabata parce di lo ta ricibiendo un tiki mehoramento.
Sinembargo Diadomingo dia 31 di Maart 2024, e informe tristo a drenta cu e cacho “Khaleesi” a muri, debi na e cu e tabata demasiado debil di heridanan pisa cu el a sufri di e maltrato aki.
E doño mes: E doño a resulta di ta e conocido Alberto Groeneveldt, kende ta fungi awor como Wedding Planner na Aruba pa bishitantenan. Ademas, Groeneveldt den ultimo eleccion na 2021 a aparece riba lista di Partido MAS tambe. Mientras tanto Partido MAS a anuncia cu a base di e actitud bochornoso aki, nan a expulsa e homber for di nan seno.
Publico na comienso di April a expresa nan disgusto total pa loke e homber a haci cu e pober cacho, te cu el a neglish’e di e forma extremo aki. Y tur hende ta aprecia hopi e intento di Luna Foundation y tambe Crijojo Trappers pa trata di rescat’e. Y a haya mas disgusto ora cu Groeneveldt a trata di defende su mes, y ta manera pusha tur culpa riba tur otro hende, menos e mes. E tabata un actitud completamente narcisista.
Fundacion oficialmente a entrega denuncia na Polis di loke a socede, y esaki a pasa pa Ministerio Publico.
Caso den Corte: Informacion cu DIARIO a ricibi ta indica cu pa Diaranson 22 di Mei venidero, Alberto Ramon Groeneveldt lo tin di presenta den Corte di Husticia.
E informe ricibi di Ministerio Publico ta indica: Groeneveldt tin di presenta dilanti Hues pa responde riba e acusacion, cu for di 1 Januari 2024 te 26 di Maart 2024, varios biaha y sin ningun meta y sobrepasando tur loke ta permiti, a intencionalmente haci un bestia (un cacho di nomber Khaleesi) dolor y/of causa e cacho herida y/of a perhudica salud di e cacho, door di laga e cacho pa tempo largo mara na un cadena demasiado cortico y inadecua y/of a keda sin duna e cacho e cuido necesario, door di keda sin duna e cacho cuminda y/of awa pa e bebe y/of cuido pa su heridanan y/of remedi.
Groeneveldt ta worde acusa di varios biaha, den e periodo di 1 Januari 2024 te 26 di Maart 2024, como doño di un of mas cacho, a keda sin cumpli cu su obligacion di duna e cacho(nan) aki e cuido necesario, door di duna e cacho(nan) insuficiente cuminda y/of di duna e cacho(nan) insuficiente awa y/of di keda sin duna e cacho(nan) cuido medico necesario di un veterinario y/of di keda sin duna e cacho(nan) suficiente espacio pa nan move.
