Desde 18 di September contribuyentenan por paga impuesto di vehiculo pa 2027

Meverly Romano di DIMP:

ORANJESTAD (AAN): Departamento di Impuesto (DIMP) a habri, for di diabierna 18 di september, e posibilidad pa contribuyentenan cuminsa paga nan impuesto di vehiculo corespondiente pa aña 2027. Asina Relacionista Publico di DIMP, señora Meverly Romano, a informa durante un entrevista cu DIARIO. 

Segun Romano, e iniciativa aki no ta algo nobo. Durante e ultimo añanan, DIMP a bin ta habri e posibilidad di pago adelanta for di luna di september, cu e intencion di facilita contribuyentenan y permiti nan distribui e gasto den varios luna. 

E posibilidad ta particularmente util pa personanan cu tin un impuesto mas halto, manera doñonan di vehiculo diesel, bus grandi, personanan cu tin dos of mas vehiculo, of companianan cu tin un flota di auto. Den e casonan aki, e suma total cu mester wordo paga na januari por ta considerabel. 

“Pa facilita nos contribuyentenan y duna nan mas espacio den nan presupuesto, nos ta habri e posibilidad pa nan cuminsa paga for di awor caba, poco-poco,” Romano a splica. 

E sistema, cu DIMP ta yama sistema di pago parcial, ta permiti un contribuyente haci pagonan durante e lunanan previo na e fecha limite di pago. Por ehempel, un persona cu un vehiculo cu plachi A por opta pa 50 florin pa luna. Di e forma aki, ora fin di januari yega, e persona por tin por lo menos e prome parti di su impuesto completamente cubri. 

Segun Romano, DIMP a nota cu hopi contribuyente ta mira e posibilidad aki como algo positivo y incluso ta warda tur aña pa e opcion di pago parcial habri pa asina nan no mester saca un suma grandi di placa di un solo biaha na januari. 

Romano a reconoce cu tambe tin reaccionnan critico riba media social, incluyendo comentario cu gobierno lo mester priorisa otro asunto, manera condicion di camindanan. Sinembargo, el a enfatisa cu e meta principal di DIMP cu e medida aki ta simplemente pa facilita contribuyentenan y no pa crea un carga adicional.

E sistema naturalmente ta rekeri cierto disciplina di parti di e contribuyente. E persona por opta pa haci pago parcial directamente na DIMP tur luna, of spaar e placa pa ora e fecha di pago yega. 

Romano a recorda cu anteriormente tabata existi e posibilidad di paga impuesto di vehiculo cada cuartal, pero e sistema ey no ta aplica mas. E alternativa actual ta precisamente e posibilidad di cuminsa haci pago parcial varios luna adelanta dunando e contribuyentenan cinco pa distribui nan pago y prepara nan mes pa cumpli cu nan obligacion fiscal pa aña 2027. 

DIMP ta invita contribuyentenan cu ta interesa den e opcion aki pa haci uzo di e posibilidad di pago parcial y evita cu e suma completo bira un carga grandi na cuminsamento di aña.