82% di vehiculonan registra tin nan impuesto di 2026 completamente paga

Meverly Romano di DIMP:

ORANJESTAD (AAN): Departamento di Impuesto (DIMP) ta registra un aumento continuo den cantidad di vehiculo di motor na Aruba. Actualmente tin 100.745 vehiculo di motor registra, segun Relacionista Publico di DIMP, señora Meverly Romano, kende a duna mas informacion tocante e situacion di pago di impuesto di vehiculo pa aña 2026 durante un entrevista cu DIARIO. 

Romano a splica cu e cifra total ta inclui diferente categoria di vehiculo, entre otro autonan particular, bus, brommer, motorcycle, truck di diesel, V-car y taxi. 

Di e 100.745 vehiculo registra, un total di 82.945 tin nan impuesto completamente paga pa aña 2026. Esaki ta representa aproximadamente 82% di e total. Segun Romano, DIMP ta considera e resultado aki positivo, ya cu e ta indica cu un gran mayoria di contribuyentenan ta cumpli cu nan obligacion fiscal. 

“Nos ta satisfecho cu e cantidad aki, pasobra nos ta riba 80%. Esaki ta un bon señal cu nos contribuyentenan ta cumpliendo y ta bira mas consciente di nan debernan di impuesto,” Romano a expresa. 

Sinembargo, ainda tin un grupo considerabel di vehiculo cu nan pago no ta completamente na ordo. Segun e cifranan di DIMP, 7.893 vehiculo tin solamente e prome mita di impuesto di 2026 paga, mientras cu e pago di e di dos mita, cu mester a wordo haci na juni, ainda ta pendiente. E grupo aki ya ta enfrenta e boet di 50% aplicabel pa pago laat. Ademas, tin 9.563 vehiculo cu no a paga ningun parti di nan impuesto corespondiente na aña 2026. 

Romano a remarca cu den e grupo di incumplimento, e categoria mas grandi ta esun di vehiculonan cu plachi A, cu un total di 15.112 caso. E otro categorianan hunto ta representa 2.344 vehiculo. 

Entre e categorianan cu ta resalta tin trucknan di diesel, cu 221 vehiculo cu nan pago no ta na ordo, y motorcyclenan/brommernan, cu un total di 612 cu no a paga nan impuesto di 2026. Romano a recorda cu den caso di e categoria aki, no por paga e impuesto den dos parti, sino den un solo pago anual. 

Tambe tin 157 vehiculo cu plachi di nomber cu no a cumpli cu nan pago. Otro categoria cu ta yama atencion ta esun di vehiculonan cu plachi T, unda e incumplimento ta rond di 60%, ekivalente na aproximadamente 240 number T cu no tin nan pago na ordo.

Pa loke ta trata vehiculonan cu plachi V, DIMP ta registra un total di 905 vehiculo cu of no a completa nan pago, of no a paga ningun impuesto corespondiente na aña 2026. 

DIMP ta sigui monitorea e situacion y ta enfatisa importancia pa doñonan di vehiculo cumpli cu nan obligacion di impuesto, pa evita boetnan y otro consecuencia relaciona cu pago laat.