SPA ta pidi atencion urgente pa calidad y falta di uniform di polis

Dani Fernandez Perna di Sindicato SPA:

ORANJESTAD (AAN): Calidad y disponibilidad di uniform di polis tawata un di e problematicanan cu Sindicato di Polis Aruba (SPA) a presenta durante un reunion cu Parlamento. Den un entrevista cu DIARIO, Dani Fernandez Perna di Sindicato SPA a splica cu e uniformnan actual ta mustra señal di desgaste despues di poco labamento, mientras no tin suficiente uniform pa reemplasa esunnan gasta. 

Segun Fernandez Perna, e estado di e uniformnan ta papia pa su mes. El a indica cu algun ta hasta falta letter, loke ta afecta e identificacion y presentacion di Cuerpo Policial Aruba (KPA). Sin uniform di reserva, polisnan ta obliga di sigui traha cu loke nan tin disponibel. 

El a señala cu e kehonan a cuminsa for di e prome luna cu e personal a cuminsa bisti e uniformnan aki. Despues di dos of tres laba, segun su declaracion, e deterioro ya tawata visibel. Fernandez Perna a enfatisa cu e uniformnan ricibi no ta di e calidad cu e sindicato a solicita y boga p’e. 

Fernandez Perna a indica cu e no por bisa especificamente unda e proceso a bay robes. Sin embargo, el a remarca cu e desgaste ta afecta hasta uniform di hefenan cu no ta sali riba caya pa haci e trabao operativo. 

E ta considera importante pa Parlamento atende e asunto lo mas pronto posibel, specialmente cu e tratamiento di presupuesto ta acercando. El a conta cu, durante e reunion, parlamentarionan a keda sorprendi ora nan a scucha di e condicionnan y e recursonan limita cu polisnan tin pa cumpli cu nan trabao.

 Pa SPA, e asunto ta merita un solucion concreto cu ta atende tanto e calidad como e disponibilidad di uniform. E meta ta pa polisnan por conta cu uniform adecuado y suficiente reemplaso pa eherce nan funccion y representa KPA debidamente.