Resultado financiero positivo den prome tres lunanan di 2026

Geoffrey Wever:

ORANJESTAD (AAN): Durante un conferencia di prensa, Minister di Finansa, Asunto Economico y Sector Primario mr. Geoffrey Wever a elabora riba e prome cifranan preliminario di ehecucion di Presupuesto 2026 pa e prome kwartaal di 2026. Conforme ley di supervision financiero cada kwartaal Departamento di Finansa ta compila e Uitvoeringsrapportage (URK).

   E Uitvoeringsrapportage ta contene cifranan preliminario di e administracion central di Pais Aruba y cifranan ricibi di entidadnan AZV, SVb, ATA, Serlimar, SEPB y Universidad di Aruba cu ta forma parti di e sector colectivo.  CAft a ricibi conforme ley e uitvoeringsrapportage pa e prome kwartaal di 2026 na tempo.

   Den cuadro di transparencia y pa informa comunidad na un forma structural, Gobierno lo elabora cada kwartaal riba e ehecucion di e presupuesto 2026 manera ta haciendo desde Gabinete AVP-Futuro su huramentacion riba 28 di maart 2025.

   Entradanan di gobierno ta mustra un subida di 24,8 miyon Florin den e prome kwartaal di 2026 compara cu e mesun periodo den 2025. Segun e Uitvoeringsrapportage 2026 pa e prome kwartaal, a ricibi un total di 439,5 miyon Florin na entrada. Esaki ta igual na 22,6% di e suma total na entrada riba presupuesto 2026.

   Di e 439,5 miyon Florin na entrada ricibi, 115,4 miyon Florin of 26 porciento ta relata na Belasting Directo,, 231 miyon Florin of 53 porciento ta relata na Belasting Indirecto y 93 miyon of 21 porciento na otro tipo di entrada.   Gobierno ta ricibi mas cu mitar di su entradanan di Belasting Indirecto.

   Pa loke ta trata Belasting Indirecto, gobierno a ricibi na entradanan di BBO/BAVP un total di 117 miyon Florin den e prome kwartaal. Esaki ta un aumento di 8 miyon Florin of  8 porciento compara cu den e prome kwartaal di 2025. Entrada na invoerrechten a subi di 58 miyon Florin den e prome kwartaal di 2025 pa 62 miyon Florin den e prome kwartaal di 2026. Esaki ta un aumento di 3 miyon Florin of 6 porciento. Subida den entradanan di BBO/BAVP y Invoerrechten ta resultado di mas actividad economico. E desaroyo positivo aki tambe ta wordo refleha den entradanan ricibi na Toeristenheffing. Den e prome kwartaal di 2026 gobierno a ricibi un total di 33,8 miyon Florin na toeristenheffing. Compara cu 28,8 miyon Florin ricibi den e prome kwartaal di 2025, entrada di Toeristenheffing a subi cu 5 miyon Florin of 17 porciento. E crecemento aki ta ilustra e desaroyo positivo di turismo.

   Den e prome kwartaal di 2026, gastonan di gobierno a yega un suma di 390 miyon Florin. Di e 390 miyon Florin, 122 miyon a bay na gastonan di personal, 47 miyon na Goederen en Diensten, 47 miyon na interes, 63 miyon na subsidio, 72 miyon na overdrachten y 39 miyon na Bijdrage en Afschrijvingen. Compara cu prome kwartaal di 2025, ta mustra un aumento di 15 miyon Florin. E aumento aki ta resultado di enro otro aumento extra di 150 Florin di reparatietoeslag na pensionadonan desde 1 di januari 2026 y mehoracion den structura salarial di kaderpersoneel y enseñanza. Pa loke ta trata e norma di gastonan di personal, e realisacion di e prome kwartaal di 2026 ta na 1,96 porciento di bbp. Si e trend aki sigui, Aruba lo cumpli ampliamente cu e norma di 10 porciento – cu un proyeccion pa fin di aña di 9,1 porciento. Gobierno ta institui un comision cu lo elabora propuestanan pa garantiza cumplimento structural cu e norma di gastonan di personal a largo plaso.

   Den 2026 Pais Aruba tin cu paga na debe un total di 648 miyon. Den e prome kwartaal un suma di 154 miyon a wordo paga na debe. Gastonan total na interes den 2026 ta 282 miyon Florin di cual 48 miyon Florin a wordo paga den prome kwartaal di 2026.

   Segun e prome uitvoeringsrapportage di 2026, debe di gobierno ta 4,9 biyon Florin cual ta igual na un “Debt-to-GDP-ratio” di 61 porciento. E debe total di Pais Aruba a baha pa 61 porciento di bbp. Esaki ta un reduccion di 3,6 punto di porcentahe compara cu e kwartaal anterior y notablemente bou di 70 porciento cu tabata e nivel na fin di 2024. E debe di e sector colectivo ta na 60 porciento di bbp. Aruba ta sigui riba e bon trayecto pa yega prome cu 2040 na un debe di maximo 50 porciento di bbp.

   Cifranan preliminario pa e prome kwartaal di 2026, ta mustra un resultado financiero pa e sector collectivo di 1,5 porciento di e bbp cu ta igual na un surplus di 118 miyon Florin. E resultado preliminario pa e prome tres lunanan di 2026 ta mustra cu Aruba ta  cumpli cu e norma presupuestario segun e Ley di Supervision Financiero (LAft). Pa Pais Aruba e resultado financiero ta 0,6 porciento di bbp pa e prome kwartaal di 2026 compara cu un resultado financiero di 0,7 porciento di bbp den e prome kwartaal 2025.

   Cu entregamento di e uitvoeringsrapportage pa e prome kwartaal di 2026 na tempo, e resultado financiero preliminario ta mustra un maneho financiero di Gabinete AVP-Futuro cu ta duna bek na comunidad y ta cumpli cu ley di supervision financiero. Gastonan ta keda dentro di e cuadro di presupuesto. Entradanan ta subi como resultado di desaroyo positivo den turismo, mientras cu e debe ta baha segun minister Geoffrey Wever.

   Minister Geoffrey Wever ta gradici Departamento di Finansa pa e trabao di compila y na demas departamentonan di gobierno y AZV, SVb, ATA, Serlimar, SEPB y Universidad di Aruba pa nan contribucion na e uitvoeringsrapportage di Pais Aruba