Minister Gerlien Croes no tin salida legal den caso di Jet Priva

Fraccion di MEP a entrega dos conseho huridico na Gobernador:

ORANJESTAD (AAN): Fraccion MEP a duna un paso institucional firme awe mainta den cuadro di supervision y integridad. Lider di Fraccion di MEP, señora Evelyn Wever-Croes hunto cu sr. Rocco Tjon a presenta na oficina di Gobernador di Aruba pa entrega formalmente dos conseho huridico detaya tocante e biahe controversial di Minister Gerlien Croes den un jet priva.

   Tur dos analisis, elabora pa expertonan independiente tanto local como internacional, ta demostra cu e actuacion di e mandatario ta den un conflicto directo cu e normanan di integridad y e leynan di aviacion.

   E hecho cu Fraccion di MEP mester a recuri na Gabinete di Gobernador no ta un acto ‘isola’. Como Parlamentario (oposicion y coalicion) nos a bin ta uza tur e canalnan oficial pa haya contesta – como parlamentario nos a haci preguntanan por escrito, peticion pa vragenuur, peticion pa debati cara a cara y ningun a duna resultado. Esaki a haci cu nos a cuminsa e caminda pa un LOB-Verzoek cual ta un manera oficial pa ciudadano pidi claridad y prueba for di un mandatario.

   Lamentablemente, ni esaki no a funciona pa haya claridad riba e asunto. Mientras tanto consehonan huridico ta keda indica cu e situacion ta uno grave y como Parlamento nos no por keda man crusa y permiti nos instituto keda chercha di e forma aki. Pues, mirando e silencio sistematico y e falta evidente di boluntad pa duna cuenta na Parlamento, como parlamentario nos a mira nos mes den e obligacion institucional di escala e asunto aki na e nivel mas halto. E ta inaceptabel pa laga e silencio di mandatarionan bira e ‘norma’.

   Consehonan Huridico: E documentonan aki ta evalua e caso for di dos angulo: (*) E normanan di aviacion internacional di Merca (FAA), caminda e jet ta registra. (*) Nos leynan local di integridad pa ministernan na Aruba.

   E prome documento presenta ta un “Formal Legal Opinion” emiti pa un experto certifica den derecho di aviacion Mericano. Segun e analisis legal basa riba Ley di Aviacion Mericano, e jet NO ta conta cu un certificacion pa por ehecuta buelonan comercial, pues den otro palabra e no mag di cobra niun hende. Consecuentemente, si Minister Gerlien Croes a paga pa e buelo aki (sea cu fondo publico of personal), e transaccion ey ta constitui un violacion directo di leynan Mericano, loke ta wordo conoci internacionalmente como un charter ilegal ("ilegal charter"). Ademas di esaki, si el a paga, e Minister tin e obligacion di mustra Parlamento e prueba di e transaccion aki.

   E di dos documento, basa riba leynan local, ta di acuerdo cu loke e conseho huridico Mericano ta bisa, pero ta bay mas leu ainda. Si e mandatario NO a paga, e buelo ta wordo clasifica automaticamente como un regalo of fabor di un balor economico halto. E huristanan local ta splica, cu un Minister absolutamente no por acepta un fabor di e magnitud aki for di un compania priva, y scondiendo esaki for di Parlamento, e Minister a kibra e obligacion di raporta (meldplicht) y e principio di transparencia cu ley ta exigi.

   Conclusion: E dos consehonan aki, tanto Mericano como esun local, ta mustra cu e Minister ta culpabel di a debilita e normanan publico. E ta simpel: si el a paga, el a bin ta forma parti di un buelo ilegal; si e no a paga, el a acepta un regalo di un suma halto ilegal pa un mandatario. Y si e ta pretende cu el a paga pero no por duna prueba, e ta viola e obligacion constitucional di duna informacion transparente y berdadero na Parlamento.

   E berdad semper ta alcansa e mentira, ni con bon e mentira ta!