E ‘Tank Farm’ lo por crea entre 40 pa 60 cupo di trabao

Segun Robert Henriquez di RDA:

ORANJESTAD (AAN): Robert Henriquez di Refineria di Aruba (RDA) a remarca cu desde e amiendanan di Parlamento di Aruba e aña aki, portanan a habri pa sondea posibilidadnan pa e refineria di Aruba. Te cu aña pasa, e direccion tabata completamente pa desmantela e refineria. El a duna di conoce cu Gobierno di Aruba awo ta para cu e dos trayectonan aki. Y RDA ta trahando simultaneamente riba ambos trayecto, cu segun e, no ta facil. Pa esaki, mester tin recursonan y haci e tarea pa sondea si realmente tin interes.

   Na final, señor Henriquez a expresa den un entrevista cu DIARIO, cu e ta keda na locual ta desea y locual ta realistico. For di estudionan y consehonan di expertonan, dificilmente por bin cu un full-fledged refinery na Aruba atrobe. Tin competencia full rond di mundo, cu casi 190 refineria, cu e mihonan na Merca y Saudi cu ta saca productonan pa bende riba mercado cu ta cumpli cu tur sorto di standard.

   El a menciona cu dos componente cu lo hunga un rol grandi pa traha un full-fledged refinery riba un isla ta e costo di energia y e disponibilidad di energia pa draai e refineria. Den pasado, e refineria tabata tin su mesun unidadnan pa genera coriente y pa haci esaki ta un gasto grandi. Den comparacion, e prijs di coriente na Merca ta super barata, y segun señor Henriquez a expresa, ya aki Aruba ta perde un tiki di gana. Un otro factor cu ta haci cu Aruba ta cana atras pa un full-flegded refinery ta e fuel cu ta kima den e fornonan, pasobra Aruba no tin gas natural manera cu ta wordo uza na tur otro refineria.

   Segun señor Henriquez, e plan obvio semper ta loke Citgo a pone riba mesa, cu ta un ‘upgrader’ pa crudo di Venezuela. Y tur experto ta riba un liña cu un upgrader ta e miho solucion cu por bin cu ne na e momentonan aki. Sinembargo, pa tin un upgrader mester tin crudo. Y pa tin crudo mester tin proveedor di Venezuela. “Y ta eynan nos ta buscando. Pero ora cu tin proveedor di crudo, mester tin un caminda pa warda e crudo. Y e caminda corecto pa cuminsa ta pa wak si di berdad tin posibilidad no solamente pa e Tank Farm pero eventualmente kisas pa un refineria”, el a bisa.

   Na Aruba tin 17 tanki disponibel den Zeewijk cu un capacidad di 10.7 miyon bari. El a remarca cu si dado caso RDA yega na un deal, e ta mustra cu toch cu por tin ganashi, cu segun e, lo duna Aruba un bida cu actualmente nos no tin. E Tank Farm lo tin su spinoff effect cu directamente lo por emplea entre 40 pa 60 trahado. Ademas di esaki, lo cobra un lease di tereno y tankinan y eventualmente tambe por cobra un Throughput Fee, cu ta e costo di e cantidad di bari cu ta trece y cuanto ta hiba.

   “Mester negocia esakinan na mesa. Sabiendo cu tin cu inverti como partido, dimes RDA no kier sali strak riba nan na prome instante. Mester duna e proveedor oportunidad pa crece y eventualmente trece tur e tankinan riba standardnan internacional cu semper nos a mantene nos mes na dje”, señor Henriquez a menciona.