Oficina di Ban Studia y EducationUSA ta sigui guia hobennan riba nan caminda pa educacion superior

Ministro Gerlien Croes:

ORANJESTAD (AAN): Desde su apertura un luna y mei pasa, e oficina di Ban Studia hunto cu EducationUSA a ricibi hopi bishita di studiantenan cu ta buscando informacion riba diferente opcionnan pa sigui studia den enseñansa superior, tanto local como internacional. Esaki ta precisamente e mision di Ban Studia: un luga central unda studiantenan por haya oportunidad igual pa informacion y guia profesional.

   E trabao principal di Ban Studia y EducationUSA ta pa guia y informa hobennan den tur paso di nan proceso di orientacion academico. E conseheronan ta brinda sosten personalisa, cuminsando cu test di interes pa yuda studiantenan identifica nan talento y preferencianan. Basa riba esaki, ta orienta nan riba posibel direccionnan di estudio, sea na Aruba, Hulanda, Merca of otro destinacionnan.

   Ademas di bishitanan individual, ta organiza y participa activamente den presentacionnan na scolnan y tambe na e oficina mes di Ban Studia y EducationUSA na Zoutmanstraat 1, Oranjestad.

   Recientemente, a ricibi bishita di un grupo di studiante di YNZ Montessori School Aruba, unda mayoria di e studiantenan a mustra interes pa sigui studia na Merca. Durante e sesion, EducationUSA a presenta informacionnan detaya riba e sistema di enseñansa na Merca y a splica e “5 stapnan pa studia na Merca”. Despues di e presentacion, studiantenan a haya oportunidad pa haci pregunta, y nan a probecha pa puntra y pidi Ban Studia tambe pa mas informacion riba estudionan y bida di studiante na Hulanda.

   Recientemente a forma parti y participa na ‘Beroepen Oriëntatiedag’ di Colegio San Antonio, unda diferente profesionalnan a comparti informacion riba nan carera, y diferente institutonan educativo local a presenta nan programanan academico. Durante e evento aki, Ban Studia y EducationUSA a informa studiantenan riba nan trabao y e sosten cu nan ta ofrece den nan proceso di scoge un estudio.

   E meta di Ban Studia y EduactionUSA ta pa sigui fortalece e orientacion di studiantenan na Aruba, duna nan acceso na informacion confiabel y guia profesional, pa nan por tuma decisionnan consiente riba nan futuro academico y profesional.

   Pa mas informacion of pa haci un cita, por bishita pagina web www.banstudia.com of por tuma contacto cu oficina di Ban Studia y EducationUSA na telefon 281-5183 of cellular 561-6284 of via email: This email address is being protected from spambots. You need JavaScript enabled to view it.