Plan pa bin cu un cushina central y saludabel pa adultonan mayor

Directora di Directie Ouderenzaken, señora Desireé Helder:

ORANJESTAD (AAN): Directora di Directie Ouderenzaken, señora Desireé Helder, den un entrevista recien cu DIARIO a menciona cu e departamento pa un tempo caba ta trahando riba un plan pa bin cu un cushina central. Meta di esaki ta pa brinda cuminda saludabel na adultonan mayor den casnan di cuido, den pasadianan y esnan na cas. El a duna di conoce cu actualmente nan ta sondeando diferente posibilidad y a acerca diferente fundacion. Un fundacion ya ta trahando riba un oferta pa e proyecto aki cuminsa pronto. 

Prijsnan di productonan di alimentacion ta birando demasiado caro. Segun señora Helder, e prijsnan di productonan esencial ta wordo regula door di Departamento di Economia. Productonan cu no ta cay bou di e canasta basico, mester tin miho bista riba e prijsnan y cumpra mas consciente. 

Den caso di adultonan mayor, enberdad mester wak riba productonan moli, manera appelmoes, cu no ta wordo regula y ta productonan mas caro y e prijsnan ta subiendo hopi. Pa e motibo aki mes, señora Helder a declara, nan ta trahando riba un miho manera y pa establece un luga central pa cushina specialmente pa nos adultonan mayor teniendo cuenta cu e diferente problemanan di salud y entre otro diabetes, presion, of colesterol halto. Di e manera aki nos grandinan por come mas saludabel y di acuerdo cu nan mesun deseo y cu nan estado di salud. 

Señora Helder a acentua, cu den e grupo aki ta bay cay mas tanto esnan cu a bin Aruba ya na grandi y no a haya tempo pa construi un pensioen completo y cu ta esnan cu no tin mucho famia of niun famia na Aruba pa contribui cu nan y duna nan sosten. 

Apart di alimentacion saludabel y cuido pa e grupo di adultonan mayor aki, e departamento den e maneho cu nan ta desaroyando, ta pensando e manera pa inclui pago di actividadnan pa nan, teniendo cuenta cu nan no por paga pa esakinan. Tambe riba forma di biba cu ta mas economico pa nan. Ya caba e departamento ta subsidia pasadianan pa asina adultonan mayor por haci actividadnan na prijsnan reduci.