The content originally appeared on:
Diario
Acuerdo di 2 di mei 2015 ta entrega prueba di incapacidad gubernamental
CAft ta boga pa continuacion di e exito di maneho Evelyn Wever-Croes
Peso di interes di debenan ta stroba Aruba disfruta di exito alcansa
ORANJESTAD (AAN) “Den un mundo cu problemanan serio, e posicion actual di Aruba ta resalta. Ta den un panorama di exito gubernamental cu a wordo logra dor di Gobierno Evelyn Wever-Croes, Aruba ta bay urna electoral na 2025.”
Palabra di informantenan experto di DIARIO, cu ta di opinion cu informacion debido mester wordo duna na Aruba, cu a wordo presenta cu e documento historico di CAft, cu ta boga pa Aruba sigui cana riba e caminda di exito, cu wordo logra dor di Gobierno Evelyn Wever-Croes.
Con grandi e logro di Aruba na 2024 ta, ta loke a keda presenta den informacionnan concreto entrega na DIARIO, pa asina Pueblo di Aruba por huzga pa su mes riba magnitud di e exito cu Aruba a logra a base di e maneho di Gobierno Evelyn Wever-Croes.
Punto di partida den e totalidad di informacion ricibi, ta e momento cu dia 2 di Mei 2015, Aruba mester a firma un acuerdo cu Gobierno di Reino, den cual a keda afirma cu Gobierno Mike Eman a pusha Aruba den un ambiente marca pa incapacidad gubernamental, cu a base di Statuut a habri caminda pa Reino deshaci di e contenido di autonomia, di Status Aparte, di Aruba.
Tabata dia 2 di mei 2015, cu Gobierno Mike Eman a percura pa Aruba wordo forza pa firma e asina yama acuerdo di Diahuebs Santo cu basicamente a deshaci di e autonomia financiero di Aruba cu a wordo pone bou supervision financiero di Reino.
E asina yama “Landsverordening Aruba Tijdelijk Financieel Toezicht”(LAft) ta exigi pa reconoce e papel di supervision financiero pa medio di CAft, cu ta supervisa e forma cu placa di Pueblo di Aruba ta wordo gasta y e forma cu ta atende cu creacion di debe pa Aruba, cu Gobierno Mike Eman a entrega como herencia historico na Aruba.
Na 2016 pa prome bez e Presupuesto di Aruba a wordo trata a base di e convenio aki y e lider di fraccion di MEP, a papia di augustus 27 2015, cu tabata un dia scur pa Aruba cu a perde su autonomia financiero pa motibo di e mal maneho cu Gobierno Mike Eman a hiba.
Na 2017, Pueblo di Aruba a bay eleccion cu tabata tin como resultado e formacion di e prome Gobierno di Evelyn Wever-Croes, cu a compromete su mes na un cambio financiero y economico cu Pueblo di Aruba pero a indica tambe cu e debenan cu Gobierno Mike Eman a laga atras pa Aruba, tabata nifica sacrificio pa Aruba.
Na 2017 ainda Aruba no tabata na haltura cu pandemia COVID-19 lo a presenta como desastre mundial. Aruba por a enfrenta e calamidad debi na e medidanan financiero cu Gobierno Wever-Croes a tuma pero tambe e forma cu Gobierno Wever-Croes a cuminsa traha riba e base pa un ampliacion economico di Aruba, pa asina aumenta entrada.
Cu e sosten cu Aruba a duna Gobierno Wever-Croes tabata corecto, awor ta bini dilanti den cifranan oficial di e Comision di Supervision di maneho financiero di Reino.
Informantenan di DIARIO ta indica, cu Aruba ta enfrenta un 18 di Maart historico pasobra e comision di supervision di Reino mes ta admiti awe den su relato oficial cu Gobierno Wever-Croes a haci un bon trabou y cu Aruba mester probecha di e situacion nobo cu a bira realidad bou maneho di Gobierno Wever-Croes pa sigui traha riba su futuro.
Na un momento cu hasta na Hulanda, e situacion financiero ta motibo cu ainda no tin un base pa un gobierno nobo, Aruba ta marca historia cu su logro cu su debenan por wordo cubri cu su entradanan.
Base internacional y oficial di bon gobernacion ta, cu e entrada di Pueblo por cubri gastonan, loke ta nifica cu e pais no mester crea mas debe.
Aruba na e momentonan aki no por disfruta di su logro grandi, debi na e sumanan enorme cu e mester paga na interes di debenan cu e maneho di Mike Eman a laga atras den e calamidad financiero cu Mike Eman a crea pa Aruba, dor di baha entrada di Aruba y kibra tur regla di Ley di Contabilidad, cu manera semper DIARIO a splica, ta e Ley cu ta dicidi con placa di Pueblo mester wordo uza.
E maneho di Gobierno Mike Eman ta haci cu na e momentonan aki, e comision di supervision impone tempo di Gobierno Mike Eman riba gobierno di Aruba, ta di opinion cu e situacion favorabel cu Aruba conoce actualmente bou Gobierno Wever-Croes mester wordo uza pa yuda deshaci di e debe cu a keda atras y fortifica e logronan alcansa.
E conclusion di e relato oficial di e comision cu ta supervisa maneho financiero di Aruba ta, cu Aruba no por regresa na e maneho financiero cu a wordo hiba dor di Gobierno Mike Eman, pero cu Aruba mester duna continuacion na e gobernacion financiero responsabel actual di Gobierno Evelyn Wever-Croes pa garantisa stabilidad financiero, economico y social di Aruba.
