Awe proteccion di votador ta haya base oficial!

​

Tur partido politico por tin su propio registro di miembro votador

*Porta ta habri pa un eleccion 2025 realmente democratico

*Awor mester atende caso penal contra voto secreto den man di AVP 

ORANJESTAD (AAN) — Na varios occasion den su articulonan, DIARIO a papia di decisionnan di Huez pa proteha e ciudadanonan Arubano contra posibel abuso di partidonan politico.

Den pasado tabata asina, cu partidonan politico por a haya informacion cu ta esencial pa Oficina di Censo por a atende cu e base di e sistema electoral di e pais, cu ta e entrega di carchi di vota na e ciudadano cu derecho di voto na Aruba, manera ley ta prescribi.

Pa ciudadanonan por haci uzo di nan derecho di voto, Oficina di Censo mester percura pa e material pa voto alcansa tur votador.

E instancia cu tin tur informacion basico di un ciudadano, ta Oficina di Censo cu asina tambe ta dispone di material cu por wordo uza den eleccion contra bienestar di e votador y democracia, dor di partidonan politico.

Eleccion 2021, cu tabata duna indicacion di lo a bira uno sumamente preta, a presenta tambe momentonan di suspenso den mundo politico.

Uno di nan tabata e exigencianan di AVP pa ricibi e informacionnan priva y secreto cu Censo tin di votadornan pa asina ricibi nan tarheta pa bay vota.

Pa e tarhetanan di voto por cumpli cu exigencianan legal, nan ta contene tur informacion apropia di votador, cju asina tambe ta bini dilanti riba e lista di votadornan cu antes tabata cay den man di e partidonan politico.

Esaki tabata nifica cu Leynan internacional tabata wordo kibra y na centronan politico na Aruba, informacionnan priva di ciudadanonan, tabata wordo uza dor di partidonan cu asina a haya forsa riba nan votadornan.

E partidonan tabata por a check kende mester a bay vota y a keda sin bay vota y asina por a eherce presion riba e votador, cu tabata wordo busca na su propio cas.

Partidonan internamente ta organisa nan mes pa por facilita votadornan e asistencia necesario pa bay vota, pero no por eherce ningun presion riba e ciudadanonan.

Na eleccion 2021 a bini dilanti, con e registronan tabata haci posibel, pa partidonan por a pone presion riba personanan cu no ta registra na nan partido como sostenedor, pa bay vota.

Un situacion cu Huez a considera contra e principio real di voto secreto ya cu presion por a wordo pone riba e votador.

Gobierno di Prome Ministro Evelyn Wever-Croes na 2021 a nenga di entrega e informacionnan aki na AVP, cu a hiba Gobierno dilanti Huez, cu a duna proteccion na e voto secreto di e votador loke ta nifica cu mundo politico no por ricibi e listanan oficial di votador cu tur nan informacion.

Awe ta bira un dia historico pa Aruba, pasobra e proteccion di e votador ta wordo hancra den un ley na caminda pa eleccion 2025, ora tur aspecto democratico di eleccion lo haya defensa oficial.

Awemainta e reunion di Parlamento lo atende cu e cambio aki.

Ta keda awor e caso sumamente importante cu no a haya atencion mas, cu ta e caso cu a base di expresion oficial di Huez por considera un crimen oficial y cu ta contene e realidad con partido AVP a entrega Huez un portret di voto secreto di ciudadano.

Esaki tabata un prueba di un caso criminal, pasobra ta prohibi pa e decision di un ciudadano na urna electoral, cay den man di partidonan politico y asina habri porta pa corupcion.

Teniendo cuenta cu e siman aki, e caso Avestruz tambe lo haya atencion total cerca publico, e asunto aki tambe awor mester haya atencion y caminda mester habri pa e acusacion di Huez wordo transforma den un persecucion oficial a base di un keho oficial pa por atende e forma con resultadonan di voto, tabata den man di AVP y hasta a wordo publica!