Relacion Cas Real Hulandes y Pueblo di Aruba ta ehemplar

​

Na caminda pa celebracion di Aña di Rey na 2024 tin un realidad

*Awe mundialmente buskeda relacion nobo entre Monarca y Pueblo 

ORANJESTAD(AAN)—Hende tin e tendencia di presta hopi atencion na loke ta negativo, pero no ocupa su mes cu tur e aspectonan positivo cu bida y comunidad ta trece cune.

Luna di April, for di e momento cu Reino Hulandes a celebra e entrada di su Reina Juliana, a bira e dia cu Aruba ta celebra su Dia di La Reina y awor Dia di Rey.

Un dia cu no ta wordo domina pa protocol, pero mas bien pa un entiasmo enorme di parti di e Pueblo di Aruba cu cantidad di eventonan.

E fecha di cumpleaños di Reina Juliana, 30 di April,  cu a wordo mantene como fecha oficial pa celebracion di Aña di e monarca Hulandes ora Princesa Beatrix a acepta e funcion, a haci cu Aruba tabata goza di dos dia sigui di eventonan importante cu tabata dia di e cumpleaños di e Monarca Hulandes y Dia di Labor.

Na e momento cu Rey Willem Alexander a reemplaza su mama riba trono Hulandes, Dia di Rey a bira 27 di April, cu ta marca final di e siman actual.

Na 2024, Aruba ta celebra su Dia di aniversario di Rey, den un mundo cu ainda pa un gran parti, pa loke ta trata paisnan cu conoce monarquia, ta trata na yega na un relacion nobo cu nan monarca.

Ora contempla e actitud publico general cu e relacion di autonomia di Aruba den Reino Hulandes, ta produci, ta topa cu e berdad, cu e representantenan eligi den Gobierno di Reino, no por midi nan popularidad cu e popularidad di miembronan di Cas Real Hulandes cu Pueblo di Aruba.

E relacion entre Cas Real Hulandes y Aruba ta asina caluroso, cu hasta ta parce cu miembronan di Cas Real ta sinti nan mes mas trankil na Aruba cu na Hulanda.

Mester papia di un relacion unico, cu ta confirma un relacion special entre Cas Real Hulandes cu e ciudadanonan Hulandes, cu pa un gran parti no ta realiza, con unico e relacion entre Cas Real Hulandes y Pueblo ta.

Un realidad, cu na Hulanda a wordo interumpi durante ultimo añanan dor di e amenazanan cu personanan cu a keda desconoci, a lanza contra Princesa Heredera Amalia y cu a haci cu medidanan special di proteccion mester a wordo introduci pa seguridad di su persona.

Algo serio a pasa na Hulanda cu a kita for di e normalidad di bida di Miembronan di Cas Real den Reino.

Un suceso cu no ta cuadra cu e forma cu Cas Real a profila su mes den comunidad, di cual el a forma parti y participa activamente.

Naturalmente semper tabata tin un grado of otro di proteccion di Cas Real, mescos cu tur persona cu ta representa autoridad of rangonan social cu por bira victima di peliger rond mundo.

Sinembargo, nos propio experencia ta hiba nos na e realidad di princesa Hulandes den nos tempo, cu como miembro di nos sociedad estudiantil, tabata participante normal den e union di nos club estudiantil.

E relacion unico entre Monarca y Pueblo den seno di Reino Hulandes, sigur ta un ehempel den nos mundo moderno, caminda mas y mas Casnan Real ta comparti cu Pueblo.

Nos ta fiel creyente di democracia, pero nos mester duna credito na e Cas Real Hulandes, cu ta entrega mundo e modelo di union real entre Pueblo y Monarca y e forma unico cu esaki ta bini dilanti den nos leynan basico di nos Monarquia Constitucional, cu realmente ta un union di dos oponente filosofico.

Momentonan special ta surgi, ora mira con hasta politiconan cu tin problema pa haya popularidad, durante bishita di Rey ta presenta nan miho cara na Pueblo, cu ta expresa su calor humano na Rey.

Status Aparte. Un relacion unico na mundo, cu a wordo logra Dia Prome di Januari 1986 na Aruba, cu a conoce realizacion di boluntad di un Pueblo, cu a duna contenido total na e concepto di Monarquia Constitucional y a bira un ehempel pa mundo.