The content originally appeared on:
Diario
Accident na Camacuri atrobe
Victima ta Reina Rosalinda Caroline Roga di 33 aña
Den boltermento su curpa a sali y keda pega bao auto
ORANJESTAD (AAN): Diadomingo mainta pa exactamente 6:05 am, yamadanan a cuminsa drenta na Central di Polis pa indica cu riba caminda grandi di Playa pa Aeropuerto, net dilanti di e dealer local di Motor World Aruba na Camacuri, tin un auto cu a bolter. Mas yamada a cuminsa drenta pa indica cu tin un persona pega bao di e auto.
Esaki a pone cu mesora diferente unidad di Polis di Playa a wordo manda pa e lugar. E prome unidad di Polis cu a yega, a bin topa cu un escena basta fuerte, pues a bin nota cu e auto cu a bolter, na final a keda di banda y berdad un solo persona femenino ta medio pega bao di dje.
Ta trata di un auto compacto Nissan Cube color preto cu number A-61366. Mirando e situacion di e victima pega cu tur e peso di auto riba dje, mesora nan a pidi pa presencia urgente di Ambulans y tambe pa Vehiculo di Rescate di Cuerpo di Bombero. Central di Polis a coordina pa asina cera e pida caminda aki completamente pa trafico.
Hisa auto y corta un pida: Como cu Post di Ambulans ta na Wayaka mes, nan a yega rapido. Mescos cu Vehiculo di Rescate cu ta djis un tiki mas pariba na Sabana Berde. Bomberonan a baha y mesora a stabilisa e auto, y a usa forza hidraulico pa hisa e auto sin cu e ta afecta e victima, y despues pone stands chikito pa por a hala e persona. Bomberonan a corta tur dos A-Pillar na e parti di windshield, pa asina haya mas acceso.
Paramediconan haciendo control y a pone aparato na e curpa, a nota cu lamentablemente mucho no por a worde haci mas, debi cu e chauffeur di e Nissan Cube no tabatin señal vital mas.
Aki personal di Ambulans a notifica Centro di Alarma pa manda busca Docter. Polis na su turno a informa Central di Polis, y asina a pone tur demas autoridad halto na altura. A mira cu Halto Comisario Ramon Arnhem tambe a yega na e lugar. Specialista di Trafico di Polis, y tambe team forensico di BFTO a presenta pa tuma tur midi y saca potret. Pa por guia famianan di e victima cu a yega, Bureau Slachtofferhulp a presenta y esaki tabata un gran ayudo.
Perde control: Di loke por a observa na e lugar, y tambe di parti Polis a duna cierto confirmacion, cu ta e Nissan Cube su so a perde control. E auto lo tabata biniendo di pabou y na altura di e edificio nobo di New India Assurance, diripiente a hala skerpi pa su man drechi, y ni 15 pa 20 meter mas leu, a baha di caminda, ranca un borchi di trafico, pa despues 3 meter despues bolter y net dilanti Motorworld Aruba a keda ariba su banda. Esaki ta net na entrada di e caminda paralelo cu ta bay pa parkeo y gazebo pa sinta mira avion na Linear Park cerca di pista di Aeropuerto.
Ta parce cu e chauffeur no tabatin seatbelt bisti, y pesey lo a wordo saca di e auto, y den boltermento e auto a bay finalisa riba dje. Esaki ta algo cu a yega di socede na diferente ocasion den pasado na Aruba, ora hendenan sin seatbelt ta wordo ‘catapulta’ for di nan auto, y despues e auto ta bin cay riba nan.
Victima tin 33 aña: Pa banda di 7:10 am, Docter a yega y a wordo guia door di Polis pa e victima. E momento ey a constata morto di e dama Reina Rosalinda Caroline Roga, naci na Aruba dia 22 September 1990, pues tin 33 aña di edad. Tin indicacion cu el a caba di labora y ta bayendo rumbo su cas. Aki por tin hopi teoria cu kizas el a pega soño y reacciona hopi liher riba stuurwiel ora di spierta bek. Pero esey ta algo cu hamas lo por wordo confirma.
Specialista di Trafico lo tin di sigui cu e trabao, hunto cu BFTO pa check si nada otro lo por a socede, e.o. cu e tairanan di e auto aki. E modelo di Nissan Cube aki tin e stuurwiel na banda drechi.
E accident aki a socede como 420 meter mas pabao di e accident fatal cu a socede 14 dia pasa net dilanti Aruba Bank su sede na Camacuri. Eynan un peaton residente pero naci na Brasil a perde su bida.
Cu e fayecimento di Reina Roga, esaki ta bira e di 5 morto den trafico na Aruba pa 2024. E victima a bay ta laga 4 yiu atras. Su famia- y amigonan a spierta riba Diadomingo cu e noticia horibel aki, pero lo keda corda e dama como un persona hopi alegre y cu monton di memoria feliz cu el a laga atras. E ta conoci como Dealer di un Casino local.
Na famia di e fayecida, DIARIO y Cuerpo Policial ta extende su mas profundo palabra di condolencia.
