The content originally appeared on:
Diario
Logronan di Gabinete Wever-Croes ta haci Gobierno di Mike discutibel
Con Mike y Benny a reparti tereno y awe mester inventarisa tereno?
Realidad ta exigi investigacion Parlamentario prome cu eleccion 2025
ORANJESTAD (AAN) Na momento cu un Gobernante papia, DIARIO tin e deber pa pone e palabranan aki den e contexto di realidadnan di e pais.
Uno di e preguntanan grandi cu ta bini dilanti ta, con por ta posibel cu Prome Ministro Evelyn Wever-Croes for di inicio por a baha su gastonan di su ministerio cu 78 porciento compara cu e gastonan cu Mike Eman como Prome Ministro a haci.
Aki nos no ta papia di un diferencia cualkier, pero di un situacion sumamente serio pasobra segun e declaracionan di Prome Ministro Evelyn Wever-Croes el a dirigi su Ministerio cu 78 porciento menos placa cu a wordo gasta dor di Mike Eman como Prome Ministro.
Esaki ta nifica realmente, cu e gastonan cu e Ministerio di Prome Ministro Evelyn Wever-Croes a haci ta solamente un cuarto parti, 25 porciento, di e gastonan cu Mike Eman a haci cu su Ministerio.
Ta trata aki di un diferencia sumamente grandi, sigur si tuma nota di e momentonan di gobernacion di e dos politiconan.
Mike Eman a dirigi Aruba na momento cu el a reduci entrada di e pais cu mitar BBO, loke a haci cu Mike Eman tabata na haltura cu el a baha e suma na disposicion di su Gobierno tambe, pa gasta.
Ademas di esaki ta topa cu e placa cu Mike Eman kier a uza di Pueblo den cual sigur e 1.6 Biyon pa proyectonan Bo Aruba, ta bini dilanti.
Mike Eman a goberna den un tempo cu Aruba a bay financieramente cabez abou, manera cifranan ta indica y cu a haci necesario pa Hulanda interveni.
Awor por comprende pakico Reino kier bini cu Ley pa supervision financiero di Aruba, pasobra a keda demostra, cu e debe nacional cu Mike Eman a laga atras como peso pa e Arubiano paga, por a wordo evita.
Si mira e diferencia entre e temporada cu Mike Eman a goberna, compara cu e temporada di gobernacion di Evelyn Wever-Croes por nota cu Evelyn Wever-Croes mester a goberna durante un tempo mucho mas dificil pa goberna debi na e debenan cu Mike a laga atras, pero tambe e caida di turismo for di Venezuela, e bashi cu e supuesto binimento di Citgo a laga atras pa economia, pa wordo sigui cu un pandemia y e recesion mundial.
Na caminda pa eleccion 2025, Aruba ta wordo presenta cu cifranan cu ta papia un idioma cla.
Bou circumstancianan sumamente dificil, Evelyn Wever-Croes a logra baha su gastonan pa maneho su Ministerio cu 75 porciento compara cu e gastonan di Mike Eman.
Pa Parlamento esaki ta sigur un situacion cu mester di amplio discusion y hasta un investigacion Parlamentario pasobra ta papia aki di hopi placa cu Mike Eman a gasta pa ta dirigente di Aruba, cu a keda destrui.
DIARIO a base di e Ley di Contabilidad lo atende cu e asunto aki tambe ya cu e ta trata cu e exigencianan mas importante pa goberna e pais y atende cu placa di Pueblo, cu placa di e pagador di belasting.
Na mes momento mester tuma nota di e anuncio, cu no tin informacion adecuado di e necesidad real di vivienda na Aruba, mientras den Corte di Husticia di Aruba ta sigui cu e Caso Avestruz cu ta basa riba e forma cu a spart tereno di Pueblo durante e epoca di Benny Sevinger y Mike Eman.
DIARIO ta en busca di tur informacion pa asina corectamente informa Aruba!
