The content originally appeared on:
Diario
ORANJESTAD (AAN): Informacion procedente di Bahamas, ta indica cu RBC Financial (Caribbean) Limited, (‘RBC’), a nombra Chris Duggan,
un nativo di Cayman Islands, como Senior Vice President y Head of RBC Caribbean Banking, cuminsando dia 1 di april 2024. E ta reemplasa Chris Ronald, ken tabata lidera e operacionnan di banco na Caribe durante e ultimo 2,5 aña y recientemente a regresa Canada como Regional President di e Regionnan Atlantico na RBC.
Duggan, kende tin su base na Nassau, Bahamas, ta tuma e responsabilidadnan como Head of RBC Caribbean Banking pa hiba e direccion strategico di e banco y maneha e strategia empresarial y vision general den henter e region di Caribe. E tin un carera cu ta cubri mas cu dos decada den e industria financiero tanto na Merca como den Caribe.
Recientemente, e tabata Representante di Gobierno di Islanan Caiman na America del Norte, na Washington DC, primeramente enfoca riba servicionan financiero. Prome cu su periodo pa e Gobierno di Islanan Caiman, e a traha como ehecutivo superior na DART Family Office y Butterfield Bank.
Erica Nielsen, Executive Vice President Personal Financing Products di RBC, a bisa: “Nos ta encanta di por duna bon bini na Chris na RBC. Naci y lanta na Caribe, Chris tin un conocemento profundo di e panorama financiero regional y un pasion pa representa e cultura. E ta altamente motiva, enfoca riba resultadonan y apasiona pa construi relacionnan di confianza cu clientenan, comunidadnan y empleadonan. Su nombramento ta mustra nos compromiso continuo cu e region. Mi ta sigur cu bou di liderazgo di Chris, Caribbean Banking lo sigui crece y sirbi nos clientenan y comunidadnan.”
Manera un miembro activo di e comunidadnan unda e ta biba y traha, e tabatin posicionnan di liderazgo den e directiva di hopi organizacionnan di beneficio durante e aña. Duggan a ricibi e Certificado di la Reina y e Placa di Honor (Queen’s Certificate and Badge of Honour) como reconocemento pa su servicio sobresaliente na e comunidad di Islanan Caiman durante e Pandemia di Covid-19.
