Prome Minister Mike Eman ta aplaudi restructuracion salarial pa maestronan

Diabierna a marca historia

ORANJESTAD (AAN): Un dia grandi pa pais Aruba cu e Fase 1 di restructuracion salarial pa e veld di enseñansa. Prome Minister mr. Mike Eman cu atencion riba e importancia di reconoce e trabao duro, mas ainda ora ta trata di traha pa bo pais, cu e salario ta husto.

   Premier Eman ta mira atras na e pensionadonan cu tambe a haya un ahuste mereci, ademas di compensacion adicional cu gobierno a pone. Tur esaki di haber cu e forma husto cu kier distribui salarialmente, na cada un cu ta contribui cu nos pais.

   No tabata un tarea facil, a hiba trinta aña pa yega na e realisacion aki. Palabra di felicitacion na Minister di Enseñansa mr. Gerlien Croes, perserverancia di e sindicatonan pa e reforma salarial, cu awe ta marca historia y ta bira un realidad.

   “Sumamente contento pa e maestronan di scol, ta locual Premier Eman a expresa.

   Mirando e sacrificio y necesidad cu e comunidad ta pasa aden, ta compromiso di e gobierno aki pa sigui bringa pa mehora e calidad di bida di tur ciudadano y yega na situacion husto pa un y tur. Kier mira pa e siguiente generacion no tin e retonan aki pa pasa aden pa sobrevivi y enseñansa ta e instrumento fundamental pa haci e diferencia.

   Pa garantisa cu e siguiente generacion sobrepasa e retonan aki, ta importante pa tin bon educacion y pa logra esaki mester tin maestronan di scol cu ta recompensa/compensa debidamente.

Minister di Enseñansa y e sindicatonan Simar, TOPA, y Seppa a logra esaki awe. Sin laga afo e espacio financiero cu Minister di Finansa mr. Geoffrey Wever ta crea pa asina logra e prome fase di e restructuracion aki. Simbolicamente a firma e declaracion aki den e edificio historico di Algemene Rekenkamer cu ta Aruba su prome Scol Publico.

   Esaki como simbolo di e compromiso di Gabinete AVP-Futuro pa cu e progreso di Pais Aruba por medio di enseñansa. Cu aprobacion di Presupuesto 2026, esaki lo worde formalisa. Masha pabien na Aruba y tur maestro cu awo a mira historia tuma luga.