Petroleo a demostra su poder den fin di siman

The content originally appeared on: Diario

Mundo ta vigila e situacion nobo despues di cumbre di clima — Prijs di crudo a zink pa bolbe subi na apertura di siman nobo  — Comercio mundial den incertidumbre cu ola nobo di Covid-19


ORANJESTAD(AAN)- Uno di e conferencianan mundial cu mas a haya atencion tabata e  Conferencia Mundial di Clima cu a wordo pospone cu un aña debi na e pandemia di Covid-19 cu a ataca na 2020.

For di 31 di October te cu 13 di November, 200 pais a reuni na Glasgow pa asina dicidi riba medidanan cu lo mester a tuma pa defende clima den futuro.

Medidanan drastico cu lo por a wordo tuma lo por a afecta e industria petrolero internacional.

Mitar di e sector petrolero internacional lo por a perde tur balor na 2036 si e paisnan a bay di acuerdo pa tuma medidanan cu lo mester ta necesario pa defende clima contra cambionan pisa cu ta wordo spera.

E exigencianan na inicio di e conferencia tabata sumamente halto y a spera cu entre otro e uzo di carbon lo a wordo geschrap.

Esaki no a socede y a tipifica e contenido di e congreso, cu segun hopi organisacion a perde tur su validez ya cu no a yega na pasonan concreto.

Pa loke ta trata carbon a cambia e contenido di e concepto original y a schrap e paro absoluto di uzo di carbon pa papia di un fase pa deshaci di carbon.

E papel cu carbon y petroleo ta hunga den economia internacional sigur a bini dilanti y esaki tabata e punto cu DIARIO a discuti ayera cu expertonan cu a bisa cu e conferencia a duna e resultadonan cu nan a spera y cu DIARIO for di siman pasa a anticipa.

Mundo ta pasa den un situacion sumamente dificil den cual economia mundial mester wordo recupera.

Carbon ta un entrada substancial pa varios pais mescos cu e sector petrolero cu ta percura pa entrada di hopi pais.

Si scrap e entradanan aki na e momentonan aki, ta mishi cu pan di hopi hende na hopi pais.

Di otro banda e resultadonan cu e aumento di temperatura mundial tin pa cierto paisnan ta causa hamber y miseria.

Paisnan pober cu no tin placa pa confronta e aumento di temperatura, condicionnan di tempo cu ta mata cosecha pero tambe ta destrui propiedad,nan, ta forma e victimanan mas importante  di e problemanan di clima cu ta sigui avansa.

Pa un grupo di pais, un avance a wordo haci den e forma cu opinionnan a topa cu otro.

Ta wordo spera cu den e proximo encuentro por yega na acuerdonan concreto, mientras ya mundialmente industrianan a cuminsa participa cu nan ta tuma medidanan pa combati e problemanan di cambio di clima.

Importante tabata cu ayera, despues di e conferencia, a wordo anuncia cu prijs di crudo a baha considerabelmente.

DIARIO a keda pendiente pa e situacion ya cu e cambionan den prijs di crudo tabata notabel.

Sinembargo, mas laat nan a bolbe cuminsa subi.

Di parti di industrianan internacional DIARIO a wordo informa, cu den por ehempel produccion di auto ya por spera un aumento drastico di autonan na 2022 mientras cu pa 2023 ta spera cu 15.4 porciento di autonan lo ta electrico.

E conferencia di clima a cera ayera cu un Europa cu atrobe ta confronta problema serio cu otro ola di Covid-19 cu ta exigi medidanan cu no ta wordo sigui cu gusto dor di poblacionnan y ta causando protesta.

E ola nobo di Covid-19 ta percura pa un menasa serio y ta wordo considera otro motibo di incertidumbre cu ta hunga un papel importante den decisionnan clave cu mundialmente mester wordo tuma.

Tur factor ta indica, cu manera DIARIO a adverti for di September, cu fin di 2021 lo nifica un situacion mundial tenso.