Portofoon pa Polis cu tambe ta hende!

​

Informacion di Ministro Rocco Tjon ta expone e realidad di Polis

*Accionnan positivo den un mundo criminal bon ekipa y poderoso

*Accion actual mester wordo sigui pa futuro evaluacion constante 

ORANJESTAD(AAN)—Manera DIARIO a trece dilanti e siman aki, ademas di tur desaroyo negativo cu ta conduci na mas problema pa comunidad, mester presta bon atencion na trabou excelente cu ta logro di esnan envolvi.

Anteriormente nos a duna nos opinion, cu tabata sumamente importante cu e Ministro di Husticia di Aruba, cu tambe ta Ministro di Asuntonan Social cu pa un parti importante ta nace den problema social, a eherce un posicion importante den Cuerpo Policial di Aruba y asina ta conoci cu realidadnan cu demasiado biaha no ta haya publicidad.

E funcion di Polis, ta crea cerca Publico e sensacion primario, cu tin un grupo di ciudadano, encarga cu bienestar di henter comunidad.

E ciudadano comun generalmente ta mira su mes cu e derecho riba proteccion cu ta berdad, pero na mes momento mester cuminsa na realisa kico e trabou di un agente policial ta encera.

Den nos mundo di tanto problema, mas y mas e imagen di hende preocupa y hasta deprimi, ta conoci. Na mes momento ta wordo pensa, cu tin gruponan di super heroe, cu nunca ta cansa, nunca ta realisa e peliger cu nan bida ta aden y nunca ta conciente di e sacrificio cu hasta nan miembronan di famia y amigonan mester haci, pa nan ta Polis.

E agente policial ta un ser humano, cu a encarga su mes cu e defensa interno di su pais, contra criminalidad.

Esaki ta nifica cu e ta expone su mes y su bida, pues su bienestar y di tur cu ta rondone,a e peliger pasobra na e momento cu e yega cerca di un persona cu ta meti den criminalidad, su bida como agente policial tambe ta na peliger.

Ta bon cu awor Ministro Tjon ta mustra kico ta haci pa Polis y ta papia di material necesario pa Polis no solamente pa Polis scapa bida di otro hende, pero pa Polis scapa su propio bida tambe.

Ministro Rocco Tjon a splica con pa algun luna un ekipo multidisciplinario ta traha riba portofoon nobo pa Polis.

Palabranan cu nos ta pone central, ya cu ora realisa kico e trabou di Polis ta encera, ta comprende cu portofoon propio y mobilofoon ta esencial pa e Polis por haci su trabou.

Si e aparatonan aki no ta traha, e agente policial tin mas chens di perde su bida cu si su arma di trabou no ta funciona.

Kico Ministro Tjon a splica? Awe Aruba ta haci e inversionnan necesario, pa den un tempo di cambionan tecnologico enorme, percura pa tur Polis tin nan portofoon y cu e vehiculonan tin un mobilofoon pa asina nan por comunica.

Naturalmente un agente policial mester di e ekiponan aki pa yama un ambulance si un hende ta malo of a sufri un accidente y no por perde tempo pa scapa su bida.

Nos ta yega na e punto di “scapa bida”cu ultimo continuamente ta bini dilanti den e trabou di autoridad, cu ta pone su mes directamente na peliger pa scapa bida di otro.

E pregunta ta awor, con un persona cu ta encarga cu scapa bida di otro, ta ekipa pa scapa su propio bida den situacionnan dificil?

Na e momentonan aki e portofoon y e mobilofoon ta haci nan trabou pa asina un pais honra bida di personal manera miembronan di Cuerpo Policial, cu por bati alarma, ora nan ta den peliger.

Sin duda e ekiponan ta costa basta placa, cu e pais mester pone riba mesa. Pero por pone e sumanan aki banda di bida di un persona, cu tin como profesion un trabou cu ta exigi pa e confronta peliger na un forma continuo?

Aruba a haci un inversion. Un bon inversion, cu mester aplaudi y mester ta modelo pa loke ta deber di Pueblo pa paga, cu ta fondonan di loke ta bon pa Pueblo y ta sirbi interes di comunidad.

Den e dianan di Carnaval, cu ta dianan di alegria pa publico, sigur mester tene na mente e Arubianonan cu ta lubida nan mes pa por sirbi nan pais!

E inversionnan tabata na nan lugar, Ministro Rocco Tjon!