The content originally appeared on:
Diario
Minister Ursell Arends ta invita comunidad:
ORANJESTAD (AAN)—Minister Ursell Arends, titular di Naturaleza, Transporte, Integridad y Asuntonan di Adulto Mayor, den conferencia di prensa Diahuebs a sigui elabora tocante e proposicion di Ley Derechonan di Naturaleza, cu lo wordo incorpora den e Constitucion di Aruba.
E dignatario a duna di conoce cu su Ministerio ta conduciendo dos “Stakeholders sessions”, kiermen dos anochi informativo unda e ta invitando pueblo di Aruba pa bin haci nan preguntanan, ser conoci cu e proposicion di ley, y participa activamente den e discusionnan aki.
Diaranzon proximo, dia 27 di Maart e prome sesion lo tuma lugar na MFA Savaneta, y Diahuebs 28 di Maart lo ta na MFA Paradera. Horario ta di 6.30’or pa 7.30’ or di anochi. E ta haci un yamada na tur ciudadano pa acudi na e encuentronan aki y asina, hunto lo por formaliza e concepto di ley, y e por cuminza su proceso formal pa bay Raad van Advies, asina e proceso di comentario y sugerencia conclui, dia 4 di April.
“Nos compromiso pa incorpora Derecho di Naturaleza den nos Constitucion, ta señala e promesa di Aruba pa ser un lider global como defensor di naturaleza.
Tambe nos ta conciente di e principionan cu a wordo poni nos dilanti den e SDG’S 16, cual ta boga pa un sociedad inclusivo, husticia pa tur, y tambe e creacion di institutonan efectivo y responsable”, Minister Ursell Arends a señala.
El a agrega cu e principionan aki ta guia e caminda pa e coexistencia armonioso cu nos naturaleza. Desde 1 di April 2023 e proposicion pa inculca y reconoce derecho di naturaleza den nos Constitucion a inicia. “No solamente derecho di naturaleza ta den e concepto di ley aki, pero tambe derecho di Oceano. Esaki ya caba for di 21 di April 2023 ta den mocion, mirando cu riba e fecha aki e concepto di ley a wordo entrega na Departamento Huridico (DWJZ) p’asina aki e por cuminza cana su caminda”, Minister Arends a señala. El a agrega cu esaki no solamente ta un Acta Legislativo pero e ta un Declaracion tambe di nos Resolucion pa honra naturaleza como un partner. E dignatario a conclui remarcando cu “protehando nos naturaleza nos ta protehando nos mes”.
