Continuidad y calidad di cuido na HOH mester keda garantisa

Parlamentario Jennifer Arends-Reyes:

ORANJESTAD (AAN): Horacio Oduber Hospital ta un institucion vital pa Aruba. P’esey, preocupacion tocante su situacion financiero mester wordo trata cu urgencia, transparencia y responsabilidad. Durante tur discusion entre gobierno, AZV y HOH, continuidad y calidad di cuido pa pueblo mester keda garantisa.

Recientemente, fraccion di AVP a bishita directiva di HOH pa tende directamente cua ta e problemanan cu hospital ta enfrenta. A base di e informacion ricibi, e fraccion a pidi pa minister encarga cu salubridad presenta na parlamento.

“Ta importante pa sa cuanto cuido AZV ta cumpra, con e tarifanan ta wordo calcula y si e compensacion actual realmente ta cubri costo di cuido. HOH, na su turno, mester presenta su cifranan y demostra unda por mehora eficiencia,” parlamentario y lider di fraccion di AVP, Jennifer Arends-Reyes, a declara.

Director di HOH a aclaria cu actualmente no tin un menasa inmediato pa pago di salario. Sin embargo, e riesgo principal ta cu, si hospital no ricibi suficiente fondo pa cubri costo real di cuido, e por wordo obliga limita cuido planeabel. Esaki por resulta den lista di spera mas largo y posponemento di tratamento.

Segun Arends-Reyes, ta importante pa pueblo compronde e diferencia. E preocupacion no ta solamente tocante funcionamento interno di hospital, sino tocante e impacto cu falta di financiamento por tin directamente riba pashent y acceso na cuido.

E situacion financiero tin diferente aspecto. Costo di remedi, material medico, transporte, energia y otro servicio operacional a aumenta. Alabes, demanda pa cuido ta sigui crece y poblacion di Aruba ta embeheciendo. Tambe mester tin claridad tocante servicio y tratamento cu posiblemente no ta wordo compensa completamente.

Analisis Independiente pa claridad.

Gobierno, AZV y HOH a acorda pa laga realisa un analisis financiero independiente, cu meta di determina cuanto fondo hospital realmente mester y cua decisionnan ta necesario pa garantisa continuidad di cuido.

“Mientras e analisis ta andando, pashent mester por sigui conta riba cuido accesibel, sigur y di calidad. Incertidumbre financiero no por wordo pasa riba pashent, personal di salud ni famianan cu ta depende di hospital,” Arends-Reyes a bisa.

Segun e parlamentario, e analisis mester produci un imagen completo y confiabel di situacion financiero di HOH. E resultado mester permiti un discusion basa riba cifra verificabel.

Arends-Reyes ta enfatisa cu cada instancia tin un responsabilidad cla. HOH mester presenta cifra transparente y sigui identifica unda eficiencia por wordo mehora, sin compromete calidad di cuido. AZV mester splica cuanto cuido e ta cumpra, con compensacion ta wordo determina y si e tarifanan ta cubri costo real di e servicionan brinda.

Gobierno, na su turno, mester garantiza cu sistema di salud tin suficiente recurso pa ofrece e cuido cu poblacion mester, tanto awor como den futuro.

Tambe mester investiga posibilidadnan responsabel pa amplia ingreso di hospital mediante otro fuentenan di entrada, conoci como “derde geldstromen”. Un ehempel por ta cuido brinda na pashent di exterior. Sin embargo, esaki semper mester sosode sin perhudica acceso of disponibilidad di cuido pa habitantenan di Aruba.

Cooperacion pa un hospital sostenibel

Pa fraccion di AVP, e solucion ta rekeri cooperacion serio entre gobierno, AZV y HOH.

“Nos meta comun mester ta un HOH fuerte, sostenibel y prepara pa brinda e cuido cu Aruba mester. Un hospital sigur y accesibel ta un condicion basico pa un sociedad cu ta pone hende prome,” Jennifer Arends-Reyes a conclui.