Dos razzia a yuda confisca cargamento grandi di droga

Tanto na Sero Patrishi y Tanki Leendert

 *Cu 6 aresto y a confisca municion y arma pisa di candela 

ORANJSTAD (AAN): Diabierna cu a pasa, e grupo investigativo di Unit Narcotica di Cuerpo Policial, hunto cu Team di Aresto a tene dos entrada hudicial na un cas na Sero Patrishi tambe na Tanki Leendert.  E razzianan aki a bira posibel, despues di a conduci un investigacion profundo a logra dal baho mundo duro un biaha mas!

   Durante e razzia inespera aki, Unit Narcotica a detene un total di 6 persona. 

   Ta trata di e hende hombernan di inicialnan S.I.W.S di 25 aña naci na Aruba, tambe R.J.V.B. di 56 aña naci na Aruba, y R.J.E.B. di 27 aña naci na Aruba.

   Tambe a detene tres muhe, esta B.F.S di 47 aña naci na Aruba, T.S.S. di 29 aña naci na Aruba, y A.A.T. di 68 aña naci na Aruba.

   Durante e razzia, e oficialnan hudicial aki a ‘canta bingo’, ora cu nan a bin topa y confisca un cargamento grandi di droga entre otro; hasj, marihuana y cocaina.

   Alabez a confisca un peña di bala, municion y un arma pisa di rifle durante e entrada hudicial.

   E accion a consisti di diferente departamento di KPA manera: K-9, Flex Team y Team Forensico di BFTO.

   Vocero policial Liliana Rasmijn a confirma cu Unit Narcotica ta traha incasablemente y haci investigacion pa combati loke ta benta di droga y mucho mas pa haci un Aruba mas sigur!

   Cuerpo Policial Aruba ta haci un suplica na comunidad y personanan cu sa algo of a wak algo pa yama e tipline di polis cu ta 111-41. Bo ta keda 100% anonimo.

   “Nos no lo stop, nos lo sigui combati criminalidad pa un Aruba mas sigur, nos comunidad por sigui conta cu esey,” Rasmijn a indica.