The content originally appeared on:
Diario
ORANJESTAD (AAN): Un palabra di pabien awe pa tur ser femenino. Pasobra awe Diabierna 8 di Maart ta Dia Internacional di Hende Muhe.
E derecho di hende muhe no solamente a bin door di nan habilidadnan, pero el a bay cu sacrificio.
Na 1975, nacionnan uni a decreta dia 8 di Maart como dia internacional di hende muhe. Esaki ta encera conmemoracion di e accidente tragico cu a tuma lugar 8 di Maart 1908, na New York caminda un cantidad grandi di trahador a protesta den un fabrica di paña pa motibo di e abuso di e dunador di trabao y tambe pa mehora e condicionnan di trabao.
Pa e motibo aki nan a worde kita for di trabao. Relaciona cu esaki e trahadornan a cera e fabrica y a declara nan mes den welga. Repentinamente a surgi un incendio provoca, cual a costa bida di 129 trahador femenino den e fabrica.
Desde e momento ey a cuminsa un lucha di e movemento di muhenan, cu cada vez ta haya mas energia y cada vez cu mas legitimidad y mas conviccion pa asina logra e derecho di un ciudadano completo y pa participa cu condicionnan igual riba tur tereno.
E movimento di muhe aki su promer prioridad ta pa desaroya e conciencia di clase y pa e dignidad di un clase trahador femenino. Un otro tarea di e movemento aki tabata pa logra incorpora realmente y activamente muhenan den e ambito social, politico, cultural y economico. Tambe pa asumi un compromiso pa lucha y conquista un trabao di igualdad y dignidad. Tambe mester pone enfasis riba e derecho di hende muhe sin perhudica e derecho di e hombernan.
Apesar cu nos ta na aña 2024 ainda tin obhetivonan pa logra, pasobra ainda tin e diferencia entre homber y hende muhe pa locual ta pago. Pero e lucha tin cu sigui. P’esey mes riba un dia tan special y pa un ser tan especial asina, mester reflexiona pa tur hende ta conciente di con ta celebra e dia aki. Pa e no bira un dia di balor puramente economico, pero un dia di reflexion.
