The content originally appeared on:
Diario
Ministro Endy Croes a confirma
Tur cos ta bon cu Compleho Deportivo Guillermo Trinidad
Proyecto ta den fase final di construccion
ORANJESTAD (AAN): Bon noticia pa Aruba! Minister Endy Croes a elabora riba e avancenan di e proyecto di renobacion di stadion Compleho Deportivo Guillermo Prospero Trinidad na Dakota.
E renobacion di e stadion ta den e fase final di construccion. Manera ta conoci, mandatario di Deporte a ricibi e bon noticia cu e yerba artificial (turf) nobo cu a instala aña pasa a keda aproba pa FIFA.
Na luna di september 2023, Sportslab tabata na Aruba unda cu a haci tur e testnan necesario y a bay back cu esaki nan Canada. Recientemente, FIFA a informa cu e yerba artificial (turf) a pasa tur e testnan di acuerdo cu e reglanan di FIFA.
FIFA a publica e acreditacion di e cancha di futbol riba nan website. Minister Endy Croes a expresa cu e ta hopi contento di ricibi e informacion aki. E documentonan oficial ta na caminda pa Aruba, mientrastanto e trabaonan a continua na e stadion. Na e momento aki, a cuminsa cu e renobacion di e “track and field”, a desmantela e atletiekbaan y lo aloca e marca MONDO, esaki lo sosode den luna di maart y april.
Tambe, den luna di maart lo baha tur e luznan y pa fin di april ta asina leu cu e stadion ta bay tin iluminacion di 800 lux. Pues, un veld cu ta cumpli cu e standard internacional di FIFA. Minister Endy Croes ta pidi un poco mas di pasenshi dentro di tres luna e proyecto ta completamente finalisa.
Por ultimo, Minister Endy Croes a duna primicia cu dia 8 di juni proximo Seleccion di Curaçao lo enfrenta Seleccion di Aruba den e wega clasificatorio di CONCACAF y probablemente e dia aki lo inaugura e stadion.
