The content originally appeared on:
Diario
ORANJESTAD (AAN): Den e carta manda pa Prome Minister door di Plataforma Nos Pais ta menciona diferente punto cu por contribui na reduci gastonan di Pais Aruba
y cu por yega na un consensus durante un Dialogo Nacional, cual ta e topico principal di e carta.
Entre e puntonan menciona den e carta por mira reglamentacion di compromisonan a largo plazo. “Mester bin un ley cu ta indica cu un gobierno no por compromete un pais financieramente pa 20-25 aña. Pa bo por haci esaki mester tin un ley cu ta bisa cu mester tin un mayoria absoluto den Parlamento na momento cu kier compromete e pais aki pa un periodo cu ta mas largo cu e periodo di gobernacion di e gobierno na mando”. Por a mira cu den pasado tabatin ministernan cu a compromete Aruba financieramente pa 20 aña y nan a sinta un periodo so y no tey mas pa responsabilisa nan mes pa cu esaki.
Otro punto importante resalta den e carta ta e independisacion di e aspecto di recurso humano di gobierno. Tur loke ta tuma den servicio, retiro, bevordering y otronan relaciona cu empleadonan publico mester wordo saca for di man di Conseho di Minister. Mester laga un instancia independiente, un fundacion apart di politica, tuma e decisionnan di ken y con ta haya bevordering, ken ta wordo tuma, cua ta e rationan cu mester tin pa tuma hende den gobierno y ki ora ta retira hendenan for di den gobierno. Cu e cambio aki lo por mira un reduccion grandi den e gastonan di gobierno pa loke ta trata personal.
Un otro punto presenta den e carta ta cu e ministernan mester tin formatie plaatsen, mescos cu ta sosode den departamentonan, es decir, sa con e departamentonann ta hinca den otro. No por ta asina cu manera por a wak den pasado cu tabatin ministernan cu 140 hende trahando na nan bureau, otronan cu 67, mientras cu otronan tabata draai nan ministerio cu 15-20 hende na un manera efectivo.
Igualmente ta menciona un reduccion den e cantidad di ministernan. “Por a mira e miho gobiernonan draai cu 7 minister y hasta den esakinan tabatin hasta algun cu pret paket. Pakico 8 of 9 minister? Si por draai e pais aki cu 5 ministerio y 2-3 secretario di estado cu ta funciona bou di e minister pa cierto tematica di e pais”. Importante pa menciona den esaki manera Otmar Oduber a bisa, mester ta 5 minister cu ta dispuesto pa traha pa Aruba si, cu ta dispuesto pa traha diasabra y diadomingo y 12 ora di dia. Mester laga e parti di politikeria un banda di probecha cu ta permiti pa tin 9 minister y ta haci uzo di dje pa acomoda candidatonan di e partido of di e otro partido ora tin coalicion. Reduccion di e cantidad di ministerio na 5 sigur ta un otro factor cu lo contribui na reduccion di gastonan di gobierno.
Responsabilisacion di directornan di departamentonan door di dunanan mas autoridad ta un punto importante tambe presenta den e carta di Plataforma. Den cuadro di esaki e ta menciona cu un punto di discusion por bira cu directornan mester haya un arbeidscontract y no ta mara mas na e LMA, dunandonan di e forma ey mas autoridad, pero tambe poniendonan personalmente responsabel pa cada departamento tin nan business plan, presupuesto y cumpli cu esakinan.
Un ultimo propuesta ta pa crea un instancia caminda cu costonan di gobierno ta wordo controla, mescos cu cuakier empresa. E instancia aki mester tin e poder di controla y bisa cu si presupuesto ta tanto, ta tanto por gasta na huur, auto, biahe, gastonan di representacion, etc.
Cu e cambionan proponi ta papia di reduccion di gastonan di gobierno di aproximadamente 30% riba e totalidad di presupuesto di Pais Aruba. “No tin motibo pa tin mas medida riba e pueblo aki. Pueblo no por carga mas medida, no por carga mas impuesto, no por carga mas aumento di premie. Ban hiba e discusion awo y no ban warda atrobe meymey di presion. Esaki no ta un discusion nobo, simplemente bo mester tin e cohon, e curashi pa kier tuma e decision”, Otmar Oduber a indica y a conclui bisando cu e ta spera cu e carta aki por haya e atencion necesario di Prome Minister.
