The content originally appeared on:
Diario
Desaroyonan historico na mundo cu ingrediente di Status Aparte
Globalisacion politico considera un camisa di forsa pa paisnan
Identidad y exigencianan nacional no por bay perdi pa Pueblo
ORANJESTAD (AAN) Maart 2024 sin duda ta entrada na mundo e realidad di resultado di decisionnan politico mundial importante despues di Segunda Guera Mundial.
Manera DIARIO a trece dilanti, e desaroyonan politico mundial ta indica un cambio den exigencianan electoral, cu lo produci situacionnan sumamente interesante na 2024.
Globalisacion tabata e palabra cu mas ta destaca na caminda pa e prome 25 aña di Siglo 21. Union di Pueblonan entre otro a bini dilanti den e creacion di Europa, cu ta bira modelo pa otro agrupacionnan di paisnan cu den cooperacion ta busca forsa.
E prijs cu mester wordo paga pa union di paisnan awe ta bini dilanti den un demanda internacional, cu DIARIO ta sigui analisa cu expertonan.
Desaroyonan mundial importante ta indica, cu na nivel internacional tin buskeda di un Status Aparte, un reconocimento di e identidadnan propio di un Pueblo cu ta bay perdi den cooperacionnan manera na Union Europeo.
Un situacion fastioso ta surgi, debi ba e hecho cu e cooperacion aki ta percura di otro banda tambe pa organisacionnan cu ta sostene defensa externo di e paisnan sigur di esnan cu no ta capaz pa defende nan mes.
Den analisis mas profundo di e situacion mundial actual, DIARIO den combersacion cu expertonan ta topa cu un realidad sumamente interesante cu ta e resultado mundial di Covid-19 cu a cambia planificacion mundial y nacional di paisnan.
Segun informantenan, e pandemia Covid-19 ta representa mucho mas cu un situacion di salud publico cu tabata su origen.
Ya mundo, basa riba e desaroyo di Inteligencia Artificial, tabata na caminda pa cambionan grandi.
E exigencianan di Pueblonan tabata parce alcansabel pa politiconan cu mester a cambia nan maneho na nivel internacional den e crisis economico, financiero, social cu Covid-19 a ocasiona y cu a haci cu modelonan nobo a wordo uza na momento cu mundo mester a adapta e agendanan pa futuro cu e tabata tin prepara.
Sobrevivencia a bira e palabra central durante Covid-19 pa hende asina tambe pa tur loke ta wordo maneha y cu hende mester dirigi.
Na e momentonan aki debenan enorme ta parti di e herencia di Covid-19 na tur pais, cu ta lucha pa sigui dilanti y den esaki ta mira cu e peso di asistencia internacional ta sumamente dificil sigur si tene cuenta cu e peso cu cambio di clima, salida di petroleo finalmente y tur otro exigencianan mundial tin pa gobernacion cu ta depende di e estado di animo y e urgencia cu votadornan ta pone riba nan gobernacion diario.
E situacion aki pues ta deshaci di e sentido di cooperacion mundial enorme cu na e momentonan aki ta bini dilanti na momento cu votadornan mester dicidi riba futuro di nan pais y ta pone exigencianan nacional dilanti.
Na mes momento e ambiente mundial cu guera a provoca, ta haci cu votadornan na paisnan importante ta exigi atencion na nan problemanan di tur dia den e mundo cu mester adapta su mes, manera ya a bini dilanti, na un clima cu ta causante di problema enorme.
Informacionnan sumamente interesante, cu mester bira base tambe pa dirigentenan riba tur tereno, ta bini dilanti den e buskeda di informacion di DIARIO pa hunto cu Aruba analisa, cambionan importante sigur pa un pais manera Aruba cu ta depende pa su economia y bienestar directo di exterior!
Na mes momento politiconan cu ta papia di futuro y mester enfrenta eleccion na 2025, mester realisa cu e exigencianan electoral lo ta mara na e cambionan mundial cu a presenta y cu Aruba te na e momentonan por a enfrenta a base di e maneho di gobernacion responsabel cu a wordo hiba.
