The content originally appeared on:
Diario
Three Rivers contento cu e apoyo ricibi di ciudadanonan
ORANJESTAD (AAN): E compania Three Rivers Real Estate VBA, despues di e ultimo sentencianan di Hues cu a cay na nan fabor, a bin ta demostra un biaha mas cu nan proyecto di ‘Secrets Baby Beach Aruba’ cu lo wordo opera pa Hyatt Inclusive Collection, ta birando un realidad y e ta desaroyando legalmente, cumpliendo cu tur rekesito di ley na Aruba. Pesey mes, e trabaonan di construccion ta sigui sin interupcion, y di e forma cu Hotel Secrets Baby Beach Aruba lo bay habri su portanan na final di e aña aki mes, esta 2024.
E caminda no tabata facil, despues cu gruponan a start mas di 30 caso legal contra Gobierno bao guia di dos bisiña na Sero Colorado, kendenan a trata di busca forma di anula tur vergunning di construccion di e proyecto, unda hasta Corte a trata bek algun di e accionnan di e bisiñanan aki. E situacion ey a causa cu e Hotel no a habri ainda, cu e situacion dramatico di perdida di empleo, dañonan economico, y tur a bay a costo di chens laboral den e area.
Semper Three Rivers a sa di demostra cu nan ta cumpli cu sentencianan di Hues, vergunning di construccion, y tambe sugerencianan bon funda ricibi di bisiñanan di Colony, mano a mano cu San Nicolas Business Association. Apesar di e obstaculonan aki, cu loke nan a bin ta sobrepasa hunto cu Gobierno, comerciantenan local, accionistanan, empleadonan y stakeholders, cu e yudansa balioso di e Contratista y colabordornan local, nan a sigui awo cu e construccion di e proyecto tan spera y necesario pa Aruba y pa area di San Nicolas.
Pa tur loke menciona ariba, nan ta anuncia awor cu Hotel Secrets Baby Beach Aruba lo bay ta cla pa habri na December 2024 cu 304 camber. Unavez cu nan logra yega e etapa aki, nan lo sigui cu e construccion di resto di e cambernan pa completa e proyecto di 900 camber, cu lo converti San Nicolas den un destino turistico di prome nivel y lo bay cambia e parti zuidoost di Aruba pa semper, mehorando su economia y crea oportunidadnan nobo di empleo.
Three Rivers a indica cu nan ta ricibiendo cooperacion completo di Gobierno, pa asina e desaroyonan di obra publico pendiente pa e area y necesario pa apertura ta wordo haci na tempo, cual sosten nan a bin ta ricibiendo siman pasa den reunion teni. E comunicacion y colaboracion di Three Rivers, Gobierno, y San Nicolas Business Association tabata esencial pa haci e proyecto aki un realidad.
Nan ta hopi contento di duna e bon noticia aki na comunidad, special pueblo di San Nicolas cu a bin ta dunando hopi señal di sosten y apoyo den e proceso aki. Nan ta kere cu nan no por gradici nan mihor, cu e noticia aki di apertura na December.
Dentro di tres luna nan lo cuminza tuma na empleo e futuro empleadonan pa Secrets Baby Beach Aruba, pa cual nan lo organisa un Job Fair, cu lo wordo anuncia den DIARIO.
