Minister Wyatt-Ras ta tuma paso concreto pa enfrenta problematica di adictonan ambulante na Aruba

ORANJESTAD (AAN): Minister di Salubridad, Asunto Social, Cuido di Adulto Mayor y Maneho di Adiccion, sra. drs. Melvin Wyatt-Ras,

a tuma paso pa enfrenta e problematica di adictonan ambulante cu ta biba riba caya y cu hopi biaha ta cay afo di sistema di cuido.

Como parti di esaki, e Minister a ricibi un plan, presenta door di Bureau Ondersteuning Verslavingszorg (BOV), representa door di Sr. Jerehm Campbell, pa implementacion di un facilidad pa cuido y intervencion di personanan cu adiccion y problema mental severo.  Ademas, BOV a presenta e plan den Conseho di Minister.

E plan, desaroya den colaboracion entre e Ministerio di Salubridad, Ministerio di Husticia y BOV, ta enfoca riba fortalecemento di cuido y intervencion ora ta necesario, den un ambiente controla y sigur. Minister a indica cu tin intencion pa habri un daklozenopvang cu lo ta habri 24/7, unda adictonan ambulante por acudi pa ricibi no solamente ayudo humanitario, pero tambe intervencion y guia.
“Nos no por sigui mira otro banda ora tin personanan cu ta cay afo di sistema pa motibo di adiccion. Como gobierno, nos ta tuma accion concreto pa brinda cuido y intervencion ora ta necesario. Nos meta ta pa contribui na restaura dignidad humano y crea oportunidad pa rehabilitacion y reintegracion den sociedad.”