Agenda di conocemento pa henter Reino a wordo firma

Fase nobo pa colaboracion structural den enseñansa superior y investigacion

ORANJESTAD (AAN): Recientemente e representantenan di institucionnan di enseñansa y investigacion for di e islanan den Reino Hulandes y Hulanda a firma e agenda di conocemento pa henter Reino (Koninkrijksbrede Kennisagenda). Esaki a tuma luga durante e conferencia di trabao di tres dia ‘Stop braindrain, start braingain!’, teni for di 13 te 15 di April 2026 na Aruba. Delegacionnan for di Aruba, Bonaire, Corsou, Saba, St. Eustatius, St. Maarten y Hulanda a participa na e conferencia aki.

   Durante un mision di conocemento na 2024, a señala e necesidad pa colaboracion estrecho  entre institucionnan di enseñansa y investigacion den Reino Hulandes. A formalisa e colaboracion estableci e aña ey, den un ‘Letter of Intent ‘(LoI). Desde e momento ey, a lansa e prome iniciativanan y e colaboracion a bira mas visibel.

  E agenda di conocemento pa henter Reino firma recientemente, ta marca un etapa nobo den e desaroyo di colaboracion structural den Reino y ta indica un continuidad di e Letter of Intent firma na 2024. Cu e firmamento, representantenan institucionnan di diferente nivel di enseñansa den Reino ta mustra nan compromiso pa sigui traha hunto riba un agenda di trabao comun. Central den esaki ta e fortificacion di exito di studiantenan di e islanan y mehoracion di e alineamento entre enseñansa y mercado laboral di cada isla.

   Representantenan di gobierno, enseñansa y mercado laboral ta comparti un ambicion comun: desaroya, retene y atrae talento di e islanan di Reino Hulandes. Minister Gerlien Croes y minister Geoffrey Wever a duna mensahenan inspirativo durante e conferencia, enfatisando e importancia di e tema aki y apoyando e conferencia di trabao ‘stop braindrain, start braingain’. Ministerionan di enseñansa di Aruba, Corsou, Sint Maarten y Hulanda, den colaboracion cu Strategic Education Alliance (SEA), Tijdelijke Werkorganizatie (TWO) y Platforma Educacion y Labor di Aruba (PEL) a organiza e conferencia.

   Inspira pa e raport ‘Braingain: an integrated approach’ di e comision di conseho di SEA, e participantenan for di tur sector a traha riba pasonan concreto pa realisa metanan pa 2030. E enfoke tabata riba desaroyo di medidanan pa contraresta brain drain, fortalesa enseñansa local, promove mobilidad y colaboracion y mehora e alineamento entre enseñansa y  mercado laboral. Esakinan a wordo traduci den un plan di trabao comun, practico, cu prioridadnan cla, responsabilidadnan y siguiente pasonan.