Minister Mike Eman presente na comienzo di revitalisacion di Caya Grandi

Dialuna mainta a cuminza!

ORANJESTAD (AAN): Riba Dialuna mainta, Gobierno di Aruba a duna inicio oficial na un fase nobo den revitalisacion di centro di ciudad, cu enfoke riba limpiesa, mantencion y mehoracion di calidad di bida den Oranjestad y San Nicolas.

   Durante un conferencia di prensa, Prome Minister Mike Eman a anuncia e implementacion di un Taskforce special, cu ta reuni diferente instancia pa atende di forma structural e situacion den e centronan di ciudad.

   Segun e Prome Minister, e iniciativa aki ta bay mas aya di limpiesa solamente. “Nos meta ta pa traha di forma consistente riba mantencion, pero tambe riba siguridad, orden y bienestar den nos barionan,” el a splica.

   Gobierno a cuminsa caba cu accion concreto, incluyendo operacionnan di limpiesa y mantencion den gran escala, cu participacion di instancia manera Dienst Openbare Werken (DOW), City Inspector y otro partnernan envolvi. E accionnan aki ta enfoca riba recupera e estado di cayanan, espacionan publico y infrastructura den e centro di ciudad.

   Prome Minister a reconoce cu e reto actual ta significativo, señalando cu durante casi ocho aña, mantencion di infrastructura, iluminacion y espacio publico a keda atras.

   “E trabao cu nos tin dilanti di nos ta mas grandi cu nos a pensa originalmente. Tin un atraso considerable den mantencion di cayanan, barionan y infrastructura,” el a indica.

   Sin embargo, segun Eman, e momento aki ta marca un cambio di rumbo, caminda Gobierno ta asumi su responsabilidad pa pone e base pa un centro di ciudad mas ordena y digno.  E strategia ta inclui no solamente intervencion fisico, pero tambe un suplica na comunidad. Gobierno lo lansa campañanan pa motiva ciudadanonan pa forma parti activo di e cambio.

   “Cada doño di negoshi, cada residente y cada organizacion tin un rol pa hunga. Solamente hunto nos por logra e cambio cu nos tur kier mira,” el a enfatisa.  E revitalisacion di Caya Grandi, mira como un paso clave den un vision mas amplio pa fortalece e curason economico y social di Aruba, creando un ambiente mas atractivo pa residente, comerciantenan y bishitantenan por igual.