Desaroyo di talento ta clave pa un sistema fuerte di cuido medico

Ministro Wyatt-Ras:

ORANJESTAD (AAN): Diasabra 18 di april 2026, Horacio Oduber Hospital (HOH) a organiza su Open Dag na HOH Academy, enfoca riba inspiracion y orientacion di hoben y studiante pa un futuro den sector di cuido medico. E Minister di Salubridad, señora drs. Mervin Wyatt-Ras, a bishita e Open Dag, pa destaca e importancia di atraccion y formacion di talento local pa fortalece e sector.

   Durante e Open Dag, participantenan a ricibi informacion riba diferente disciplina, a sigui demostracionnan LIVE y por a bishita departamentonan manera Radiologia, Sala di Operacion, Dialisis, Functie afdeling y Rehabilitacion. E evento a pone enfasis riba e diferente oportunidadnan profesional cu sector di cuido medico ta ofrece.

   Tocante e importancia di e evento, Minister Wyatt-Ras a enfatisa: “E construccion di un sistema di salud fuerte y sostenibel ta exigi inversion den nos hobennan. Iniciativanan manera e Open Dag aki tin un rol clave den orientacion y motivacion di futuro profesionalnan, mustrando cu sector di cuido medico ta ofrece hopi oportunidad pa desaroyo profesional. Nos ta comprometi pa sigui stimula mas hoben y profesionalnan pa integra den e sector y contribui activamente na bienestar di nos comunidad.”

   E iniciativa aki ta contribui directamente na e mision di Ministerio di Salubridad, Asunto Social, Cuido di Adulto Mayor y Maneho di Adiccion pa sirbi cada ciudadano den tur fase di bida, optimalisando cuido y apoyo pa promove bienestar integral. Ademas, e ta alinia cu e prioridadnan strategico di Gobierno pa reforsa un sistema di salud sostenibel, amplia capacidad di personal medico y inverti den educacion, prevencion y desaroyo di talento local.

   Ministerio di Salubridad ta felicita Horacio Oduber Hospital (HOH) cu e Open Dag exitoso aki y ta reafirma su compromiso pa sigui apoya y colabora na iniciativanan cu ta stimula desaroyo di talento y fortalece e sector di cuido medico na Aruba.