Minister Geoffrey Wever ta spera un cantidad grandi adulto mayor den ‘Fiesta di Cunucu’

Diadomingo awo na Santa Rosa

ORANJESTAD (AAN)-- Minister di Economia, Finanzas y Sector Primario, señor Geoffrey Wever, den conferencia di prensa a elabora riba e Fiesta di Cunucu, cu lo tuma lugar Diadomingo venidero, esta 28 di Juni na Santa Rosa.

   Esaki ta un bunita proyecto, en colaboracion cu e Ministerio encarga cu Adulto Mayor, y e Ministerio di Sector Primario, ehecuta pa e dos departamentonan: Ouderenzaken y Santa Rosa. El a reitera tambe cu aña pasa a firma un MOU unda nan a compromete na colabora mutuamente, pa engrandece e sector primario y alavez, yuda nos adultonan mayor pa ta participe den esaki y asina crea un “win-win” entre e dos ministerionan.

   “Y awo ta bunita cu nos por anuncia cu e Fiesta di Cunucu ta bay tuma lugar dia 28 di Juni, y e ta bay ta un mainta bunita, ameno, caminda cu ta bay tin hopi bendemento di cuminda local y lo tin premio tambe pa e chefnan cu ta bay cushina e cuminda local, traha cu ingredientenan local, p’asina nos stimula tambe e produccion na Aruba, y nos ta duna respet y aprecio pa nos cumindanan tradicional, y esaki den un ambiente ameno hunto cu nos grandinan. Lo tin baile y tambe nos ta bay reconoce cinco adulto mayor cu ta activo den e sector primario.

   Asina ey for di diferente animo nos ta stimula nos grandinan pa keda activo, sigui participa den nos comunidad, y tambe nos ta keda pusha nos sector primario na Aruba, cu pa nos ta hopi importante tambe, mirando cu Aruba ta depende den gran parti di importacion y nos kier pa mas produccion local, pa nos hendenan mes produci, pa nos tin mas cria di bestia, mas pesca y agricultura, y trece e productonan mas cerca di nos comunidad”, e dignatario a remarca.

   Minister Wever a mustra optimista cu ya caba tin un mercado na Santa Rosa, unda nos productornan local ta bende nan productonan, y e comunidad ta responde na un forma positivo.

   E mandatario a gradici su colega Minister Wyatt-Ras pa e colaboracion aki, y el a bisa cu ta bunita cu gobierno ta traha hunto den diferente ministerio, pa logra e metanan comun cu nan tin, trahando y cooperando hunto, poniendo  experticia di e departamentonan pa logra esaki, den e caso aki el a gradici Santa Rosa, y Departamento di Adulto Mayor, y su directornan pa pusha e proyecto aki y tur e coleganan cu ta trahando pa realiza esaki. Finalmente e dignatario a expresa cu e ta spera presencia di un cantidad grandi di adulto mayor, Diadomingo proximo pa participa den e Fiesta di Cunucu na Santa Rosa.