GKMB protehando comunidad contra malesanan transmiti pa sangura

ORANJESTAD (AAN): Tur dia, un team dedica di profesionalnan ta traha den diferente barionan di Aruba pa proteha nos comunidad.

Esaki ta e team di Gele Koortsmuskietenbestrijding (GKMB), un seccion di Directie Volksgezondheid (DVG).

   GKMB ta encarga cu control y maneho di sanguranan na Aruba. Nan trabao ta contribui directamente na prevencion di malesanan manera Dengue, Chikungunya, Zika y Keintura Geel, cu por wordo transmiti door di e sangura Aedes Aegypti.

   Pa logra esaki, personal di GKMB ta realisa inspeccion den barionan, identifica y elimina posible criaderonan di sangura, brinda informacion y conseho na comunidad y tuma accionnan preventivo pa reduci e cantidad di sangura rond di casnan y negoshinan.

   Hopi biaha comunidad ta mira personal di GKMB canando den bario of bishitando casnan, pero no tur hende sa exactamente kico nan funcion ta. E bishitanan aki ta un parti esencial di e trabao preventivo cu ta yuda mantene Aruba mas sigur y liber di malesa transmiti pa sangra.

   Personal di GKMB semper ta facilmente reconocibel. Nan ta bisti cu polo shirt color creme cu logo oficial di DVG y ta carga identificacion oficial durante nan trabao.

  DVG ta anima comunidad pa conoce e equipo di GKMB. Prevencion di malesanan transmiti pa sangura mester ta un esfuerzo comparti entre Gobierno y cada ciudadano pa por beneficia henter comunidad.

A traves di nan labor diario GKMB ta sigui traha pa proteha Aruba. Conoce GKMB pa hunto nos proteha bo famia y Aruba completo.