Segun Rulienne Arends di FADA:
ORANJESTAD (AA): Uzo di vape bou di muchanan menor di edad ta keda un motibo serio di preocupacion na Aruba.
Segun Rulienne Arends di Fundacion Anti Droga Aruba (FADA), vaping ta e topico di charla cu scolnan ta solicita mas frecuentemente durante e ultimo tres añanan.
Señora Arends a indica cu e edad na cual muchanan ta cuminsa haci uzo di vape ta birando cada biaha mas jong. Presion di grupo, conoci como peer pressure, tambe ta hunga un rol importante den e desaroyo aki.
Docentenan ta contacta FADA regularmente pa informa cu hasta muchanan di scol basico ta yega scol cu vape den nan posesion, apesar cu nan a participa anteriormente den charlanan informativo tocante e peligernan y consecuencianan di vaping.
Arends a remarca tambe cu varios supermercado ta bende productonan di vape, mientras cu no tin suficiente control riba benta di e productonan aki na personanan menor di edad.
Aunke vaping ta e topico mas solicita, FADA ta ricibi hopi peticion pa charla tocante otro sustancianan, entre otro alcohol. Den varios caso, muchanan ta haya acceso na bebida alcoholico den nan propio cas, unda mayornan mes ta permiti nan pa purba. Segun Arends, mayoria di e muchanan no ta haci uzo di e sustancianan aki scondi.
E informacion cu señora Arends a duna, ta pone na indica cu e problema no ta limita solamente na comportamento di e muchanan. E normalisacion di vaping y consumo di alcohol den ambiente familiar, combina cu falta di control riba benta na menor, por contribui na cu hobennan no ta percibi e riesgonan como algo serio.
“E problema di vaping ta birando dia pa dia ta birando mas serio. Tin mucha cu ta comprende e informacion cu FADA ta comparti tocante vaping y nan ta admiti cu nan no ta consciente di e riesgo y peligernan. Pero tin mucha cu no ta worry, pasobra nan ta haya e vape na cas, e ta permiti na cas, nan no ta wak e peliger y nan ta sigui haci uzo di vaping”, señora Arends a expresa.
