Mas cu 25 baki pickup yen di sushi colecta na Rooi Afo y Seroe Preto

Win Werleman di Serlimar:

ORANJESTAD (AAN): Durante e Accion di Bario na Rooi Afo y Seroe Preto, Win Werleman, Hefe di Departamento di colecta sushi na Serlimar, a indica cu e cantidad di sushi cu a logra piki ta confirma cu tin un necesidad grandi den e comunidad pa bin cu facilidad cu ta yuda mantene nos barionan limpi.

“Nos a mira hopi, pero hopi sushi colecta un biaha mas,” Werleman a declara. Segun dje, entre e materialnan retira tabatin diferente meubel, sofa, stoel, hero y varios otro tipo di sushi grandi cu normalmente no por deshaci di dje manera ora di haci cu sushi regular di cas. Werleman a destaca cu e ekipo di Serlimar a haci un trabou intensivo durante e accion di bario. “Nos ta mira cu e necesidad di nos habitantenan di Seroe Preto y Rooi Afo ta grandi pa bin cu mas accionnan di limpiesa manera esaki,” el a remarca.

Segun un calculo preliminar, e cantidad di sushi colecta durante e accion di bario ta representa aproximadamente 30 yarda cubico di material. “Si nos pone esey den pickupnan, nos por papia di mas o menos 25 pickup yena di sushi,” Werleman a splica.

El a agrega cu e cantidadnan manera esaki ta un muestra di e impacto cu e accionnan di bario tin den comunidad. “Ora nos ta atende bario, ta importante cu comunidad tambe bira mas consciente di e necesidad pa mantene nan entorno limpi.”

E resultado di e accion di bario na Rooi Afo y Seroe Preto ta bay den liña cu e vision di Prome Minister mr. Mike Eman pa crea un bario mas limpi, mas cuida y mas agradabel pa biba. Asina Gobierno ta bay directamente den comunidad pa atende cu necesidadnan di nos hendenan, fortalece e sentido di responsabilidad comparti y crea un ambiente mas saludabel pa un y tur.

Na mes momento, e cantidad di sushi cu a logra colecta den apenas algun ora ta confirma e importancia di Zona di Desperdicio, cu a habri inicio di juni como un facilidad permanente pa nos hendenan por tira sushi di un manera responsabel. Accion di Bario y Zona di Desperdicio ta complementa otro: un ta ofrece solucion directo den comunidad, mientras cu e otro ta brinda un facilidad permanente pa evita cu sushi termina den mondi, banda di caminda of rond di nos barionan.

E combinacion di e iniciativanan aki ta forma parti di e esfuerso continuo di Gabinete AVP-Futuro pa mantene nos isla limpi, protege nos naturalesa y fortalece e calidad di bida den tur bario di nos isla.