Local News

Mañan ta sigui caso penal contra Chania Fernandes Pedra cu a dal dos hende mata cu Jeep y core bay

17 November 2026
This content originally appeared on Diario Online.
Promote your business with NAN

ORANJESTAD (AAN): Mañan merdia 2’or den Corte di Husticia, ta sigui cu e caso penal cu Ministerio Publico a cuminsa contra e dama Chania Chante Fernandes Pedra,

relaciona cu e lamentable accidente cu a sosode riba 4 Januari 2025, caminda Chania manehando un Jeep Compass, a dal mata e dama Josely Paulina Vasquez (65) y e homber Carlos David Vialez Valeiro (54) y sigui core bay.

   Dia 5 November 2026, ora cu Hues a dicidi cu ta sigui cu e caso pasobra un biaha mas e acusado Chania Fernandes Pedra no a presenta cu abogado, Chania Fernandes Pedra a presenta un keho contra e Hues. E keho a wordo trata den Corte, caminda tres Hues cu ta forma Hof, despues di a scucha tur e argumentonan di abogado mr. Odor, a pospone e caso un rato pa evalua y a bolbe cu un decision. Hof ta haya e keho contra Hues no funda. Hof a mustra cu e decision di Hues cu ta trata e caso sin abogado, no ta motibo pa keha Hues.

   Hof a dicidi cu e mesun Hues ta sigui trata e caso y cu dia 18 November 2026, e Hues ta sigui cu e caso caminda a lag’e.

   Posiblemente un abogado: Mañan lo haya sa si mr. Odor lo bay defende Chania Fernandes Pedra of no. Dia di tratamento di e keho contra Hues, Hof a puntra mr. Odor si e ta e abogado di Chania den e caso penal tambe. Mr. Odor a bisa cu e ta representa Chania pa e keho so. El a sigui bisa cu e no sa ainda si e lo bay representa Chania den e caso penal. El a bisa Hof cu e mayornan a keda di mande e documentonan di e caso pa e evalua.

   Tratamento di caso: Ta asina cu si Chania Fernandes Pedra a logra haya abogado of no, tratamento di e caso ta sigui. Hues lo bay haci Chania Fernandes Pedra preguntanan. Tin e famianan di e victimanan cu lo bay haci demanda di daño y despues ta Fiscal lo bisa kico e ta pensa di e caso y ki castigo e ta exigi pa Chania Fernandes Pedra.

   Lo informa lectornan tur loke a sosode den sala di Corte di Husticia.