Alerta ora cu turista a bira malo den lama na Tres Trapi y fayece

Varios hende a cuminza cu CPR riba e victima

ORANJESTAD (AAN): Tabata Diamars algo despues di 3’or di atardi, cu Centro di Alarma 911 a notifica Central di Polis, cu e momento ey un hende homber a bira malo na e lama di Tres Trapi y no ta reaccionando e momento ey.

   Esaki a pone cu mesora Centro di Alarma a manda Ambulans, y Central di Polis na su turno a dirigi patruyanan di Polis.

   Na yegada di e prome patruya di Polis na Tres Trapi, nan a baha y topa cu algun persona na oriya di lama, y e momentonan ey ta practicando CPR, pues ta purbando di reanima e victima.

   Polisnan a yega, y di biaha e agentenan a sigui cu e proceso di reanimacion.  En total, dos unidad di Ambulans a yega cu sirena, y mesora Paramediconan a baha y sin stop a tuma over cu CPR, y a sigui check pa pulso.

   Pero lamentabelmente despues di basta intento no por a haci nada mas pa e turista masculino di 51 aña di edad, di nacionalidad Mericano.

  Docter a presenta como tambe departamento di Slachtofferhulp pa brinda e sosten na e famia.  Finalmente ta agencia funeraria a yega cu shersh pa asina transporta e restonan mortal.

   DIARIO y Cuerpo Policial Aruba ta manda palabra di condolencia na famia di e fayecido.