The content originally appeared on:
Diario
ORANJESTAD (AAN): Hendenan Diadomingo atardi banda di 2:00 pm a mira huma ta sali for di un negoshi di auto net un tiki pariba di sucursal di CMB Bank riba Boulevard, a core yama 911 y meld na Centro di Alarma di esaki.
Esaki mesora a pone cu unidad di Cuerpo di Bombero a sali rumbo pa e lugar aki. Centro di Alarma a notifica Central di Polis tambe pa manda patruya eynan. Central a dirigi diferente patruya pa e sector pa check y controla e situacion.
Polis a yega y topa Bomberonan ta check di pafo e negoshi di auto. Tanto Polis y Bombero no ta mira huma, pero si ta haya holor di candela. Aki e pensamento a crece, cu kizas e candela ta den e edificio, pero tur cos ta hermeticamente cera.
Decision e ora a cay, cu ta bay kibra e candal di e porta principal. Net cu nan ta preparando pa haci esaki, diripiente un empleado di e negoshi a yega, y e tin yabi di e portanan. Pues el a usa e yabi, y asina Bombero y Polis a drenta pa controla.
Sorprendentemente parti paden di e negoshi, no tabatin nada di holor. A sigui check, y pafo unda tin un garage, a bin topa cu dos homber ta kimando y smelt tubonan di koper, den un garetia.
Polis a bay atende ambos mesora, pa loke nan ta haciendo, y check e.o. di unda nan a haya tubo di koper. Nan a duna nan un scual. No ta conoci si e dos personanan aki ta empleado eynan, of di otro negoshi den cercania.
E resto di Diadomingo atardi a sigui trankil despues.
