Julie Wever, director di FCCA
ORANJESTAD (AAN)-- Señora Julie Wever- Director di Fundacion Cas pa Comunidad Arubano (FCCA), a sigui relata tocante e maneho di FCCA, pa loke ta e prijs di material pa construccion di vivienda.
Wever a indica cu semper nan ta wak tur opcion, y ta evalua tur e tecnicanan nobo cu tin, pa wak con nan por rebaha e prijs.
“Si pa FCCA ta importante e calidad y durabilidad di un producto. Aworaki nos ta papia di puramente containers, y nos ta evalua prome si esaki ta algo cu ta duradero pa FCCA.
FCCA a caba di uza diferente tecnica di construccion, kiermen no ta algo cu FCCA no ta haci, pero tur cos tin su pro y su contra. Bloki tradicional ta un experticia cu tin na Aruba. Dus, mayoria di e contratistanan sa hopi bon, esey ta nan specialidad pa traha cu bloki. Esey ta duna e siguranza cu bo por garantiza e calidad. FCCA a traha diferente metodo pero no tur a bay mesun bon. Pues, mester evalua hopi bon, prome cu bo uza algo nobo. Pakico, pasobra e clima di Aruba ta diferente; e salpeter ta diferente, anto hopi biaha bo no tin e historia di e clima na Aruba pa busca e tipo di material adecua.
Si nos ta wordo acerca hopi cu diferente material, tin di Costa Rica, y di otro caminda pero no ta tur ora e clima ta mesun cos”, señora Wever a relata.
El a agrega cu FCCA a siña con den pasado a uza diferente tipo di beton, un di nan cu a bin di Hulanda y tabata tin diferente reto. Un grupo di Hulandes a bin Aruba pa siña e contratistanan con pa traha cu e producto, y na final di dia a resulta cu den tres pa cuater aña e murayanan a skeur. E no a wordo aplica di manera corecto y e contratistanan, poco, poco, a keda bira menos y esaki ta e retonan. Pero nos ta keda evalua tur dia con pa rebaha e prijs.
