The content originally appeared on:
Diario
Preocupa cu cifranan di violencia di genero a subi:
*Tin hopi caso bao hende muher Venezolano
ORANJESTAD (AAN) – Juliene Duran Paez, Senior GBV Officer na HIAS Aruba, den entrevista cu DIARIO a bisa cu e cifranan pa loke ta violencia di genero a subi. Violencia di genero ta algo cu ta prevalece den nos comunidad, Duran Paez a señala, indicando cu den e siman aki di Dia Internacional di Hende Muher, cu a keda celebra diabierna 8 di Maart, HIAS a conmemora e dia aki cu diferente actividad, pa hendenan muher sa kico ta nan derechonan.
HIAS tabata tin diferente tayer, pa empodera hende muher, sa nan derechonan y obtene diferente skills y habilidadnan den nos comunidad.
El a señala cu bao e damanan residente Venezolano e violencia a aumenta, unda cu cada caso ta individual, y den e Congreso cu a tuma lugar na Universidad di Aruba HIAS a enfoca riba e tema di “Intersectionality” cu ta e diferente componente of factornan cu tin un opresion riba e hende muher. Hopi di e casonan cu nan ta haya ta hende muher Venezolano cu tin un relacion cu un partner Arubiano y hopi biaha nan ta bin cu e idea di firma pa e dama, ta bise cu e ta bay dun’e tur cos si e ta keda na cas, y asina e tipo di manipulacion aki y den esey e persona ta den un situacion di violencia, realmente, cu ta e promesa falso ey di por retene un hende di por ta liber, y tin su derechonan. Vooral bao di hende muher, Julienne a reitera. Esaki ta e casonan cu HIAS ta ricibi y viceversa.
HIAS ta preocupa cu e cifranan cu tin pasobra violencia por escala y cu eventonan manera e Congreso, nan por purba di preveni, mitiga e riesgonan specialmente pa hende muher, y tambe pa informa cu tin organizacionnan cu por yuda, duna un man y un apoyo na e personanan aki.
Julienne a expresa cu e sernan femenino aki mester sa cu nan tin tur nan derecho di ta liber di violencia, y di cualkier circunstancia cu por pon’e den un situacion vulnerable, y sa cu tin hende eyfo cu por dun’e apoyo, y cu hunto por apoya otro. “Nos tey pa por brinda bo e espacio cu bo mester. Cualkier cos, anytime bo por pasa HIAS y otro organizacionnan y semper tin den mente cu nos ta poderoso. Nos ta hendenan muher empodera, nos por bay dilanti hunto si nos ta wanta man y lucha contra violencia di genero y otro tiponan di violencia”, Julienne Duran Paez a remarca.
