Mocion di AVP-Futuro riba Jaarrekening 2020 ta un show politico di mal gusto pero na mes momento peligroso

Parlamentario Tromp-Lee

• Contraloria General ya a haci investigacion detaya
• Tur dato den pasado ya caba a wordo discuti ampliamente 

ORANJESTAD (AAN): Durante e tratamento di e Jaarrekening 2020 den Parlamento, e fraccionnan di Futuro y AVP a presenta un mocion pa laga haci un investigacion "independiente". E obhetivo di e investigacion aki ta pa busca manera pa persigui civilmente y financieramente esnan cu a tuma decision den e aña di mas dificil di nos historia.

   Nos a vota contra e mocion aki, pasobra e ta un wega politico innecesario y peligroso. Nada mas y nada menos cu un show politico di malgusto.

   Un mocion pa tira placa afo y crea persecucion: Loke fraccionnan di Futuro y AVP kier logra cu nan mocion, ta un gasto inutil di recurso di pais. E propio Contraloria General (Algemene Rekenkamer Aruba, ARA) ya caba a haci investigacion detaya y a entrega su informe completo riba Jaarrekening 2020 y fondonan di FASE. E datonan, observacionnan y leccionnan pa futuro ya t’ey caba riba mesa y a wordo discuti abiertamente. Paga pa un "otro" investigacion pa haci e mesun trabao ta nada mas cu tira placa di pueblo afo.

   Trabaonan hopi grandi a keda realisa bou di presionnan enorme, unda gobernantenan y trahadonan di pais a duna cara pa salba nos comunidad. En bes di habri inhustamente caminda pa persecucion politico, nos mester uza e recomendacionnan valioso di ARA pa mehora e sistema administrativo y asina nos ta miho prepara den futuro pa un posibel calamidad di e magnitud aki.

   Mas preocupante ta cu e mocion aki kier uza aparato di Gobierno pa inicia persecucion civil y daño patrimonial contra esnan cu a duna cara y a tuma decision dificil den tempo di crisis. E ta crea un mal precedente y, na mi opinion, completamente innecesario. Si den un futuro crisis un gobernante of funcionario sa cu e lo wordo persigui despues pa actua lihe pa salba bida, ningun hende lo kier asumi responsabilidad y pueblo lo ta esun cu lo sufri e consecuencianan.

   Un aña di crisis sin precedente: E aña 2020 no tabata un aña administrativo comun y coriente; tabata e aña cu pandemia di COVID-19 a golpia Aruba y turismo a bay plat completamente di un dia pa otro. Den e caos ey, caminda nos pais tabata na candela, no haci nada no tabata un opcion. Boso por imagina kico lo a pasa si Gabinete Wever-Croes no a mustra determinacion y curashi?

   A duna mas di 341 miyon Florin na sosten di emergencia, manera FASE y subsidio di salario, pa evita un catastrofe humanitario y pa garantisa cu miles di famia tabatin cuminda riba mesa. Nos no mester lubida cu nos mama y tatanan di famia tabata man na cabes, companianan desespera y henter mundo sin sa, na prome instante, kico y con pa haci.

   Madurez politico y enfoke riba futuro: En bes di haci fiesta politico cu dolor di pandemia, nos mester mustra madurez y enfoca riba futuro. Nos a vota na fabor di Jaarrekening 2020 pa reconoce e realidad di e aña ey, m’a nos a vota y lo keda vota CONTRA show y oportunismo politico na tur momento. Mas cu tur cos, nos lo no ta di acuerdo cu e porta cu a keda habri pa posiblemente cobra bek e placa cu a keda duna na FASE y MKB-steun na nos hendenan y companianan.