Consul Mericano pa Caribe Hulandes ta habri aplicacion pa beca di Young Leaders of the Americas

Siete entrepreneur lo biaha pa Merca pa un intercambio profesional

ORANJESTAD (AAN): Consulado Mericano na Corsou a caba di anuncia cu aplicacionnan awor ta habri pa e “2027 Young Leaders of the Americas Initiative (YLAI) Fellowship Program” y e biaha aki e programa aki ta expande for di 4 te na 7 beca, y pa prome biaha lo acepta aplicacion di Bonaire, St. Eustatius, y Saba, ademas di ta acepta di Aruba, Corsou y St. Maarten.

   E entrepreneurnan selecciona lo uni cu 26 ex-alumno di YLAI di Caribe Hulandes y lo tin acceso na un red internacional di lidernan empresarial y entrepreneurs.

   Historia: Lanza na 2015, YLAI ta e programa principal di intecambio empresarial di US State Department.  E programa aki ta conecta lidernan empresarial nobo for di henter hemisferio West cu negoshinan Mericano pa fortalece e habilidadnan di entrepreneur, amplia rednan comercial, aumenta comercio, y crea oportunidadnan pa crecimento empresarial.

   Loke e beca YLAI ta ofrece: YLAI ta un intercambio profesional di cinco pa seis siman na Merca, totalmente financia, cu ta inclui coremento di stage pa cuatro siman na un negoshi of organizacion Mericano.  E beca ta combina experiencia empresarial practico, capacitacion profesional, mentorship, y chens pa habri contacto.

   E participantenan mes lo bay haci esaki:

(*) Prepara pa exito, unda nan lo completa un training empresarial virtual y lo desaroya un Business Leadership Action Plan prome cu nan biaha pa Merca.

(*) Adkiri experiencia practico: Nan lo pasa cuatro siman trahando hunto cu un partner di negoshi Mericano pa intercambia di idea, reforza practicanan di negoshi, y explora mercadonan nobo.

(*) Establece contactonan balioso, y participa den eventonan di networking cu entrepreneurnan Mericano, lidernan empresarial, y representantenan di Gobierno di Merca, incluyendo un foro di clausura na Washington, D.C.

(*) Sigui crece, pues nan lo regresa nan pais cu habilidadnan nobo, cu contactonan profesional, y acceso na mentorship cu lo sigui, actividadnan pa ex-alumnonan, y chens di colaboracion futuro cu socionan Mericano

   Ex-alumnonan di YLAI tambe por participa den un intercambio di salida, dunando bon bini na nan socionan comercial di Merca pa nan paisnan di origen pa explora oportunidadnan nobo.

   Esnan cu por aplica: Si bo kier aplica, y bo mester tin entre 25 y 35 aña di edad (dia 1 di Januari 2027), y ta biba na Aruba, Bonaire, Corsou, St. Maarten, Saba, of St. Eustatius.  Bo mester a opera un negoshi pa por lo menos dos siman y demostra cu el a crece.  Bo mester por domina ingles, y por cualifica pa un visa J-1.

   Tambe bo mester ta cla pa viaha pa Merca na Juni y Juli 2027.  Bo no mester paga nada pa aplicacion, pasobra Gobierno di Merca ta cubri costo pa algun beca, incluyendo sosten pa e J-1 visa, pasashi ida y vuelta pa Merca, tambe pasashi pa viaha rond di Merca relaciona cu e programa, tambe lugar di hospeda y cuminda, y aseguro limita di accident y malestar.

   Deadline pa aplica ta dia 8 di November 2026.  Pa aplica bay na e website aki:

https://ylai.state.gov/apply

   Si bo kier sa mas di exigencianan pa por wordo escogi, check e website aki tambe pa mas detaye:

http://ylai.state.gov

   Si bo tin pregunta riba e aplicacion, bo por manda email na:

This email address is being protected from spambots. You need JavaScript enabled to view it.

   Programa di beca YLAI ta patrocina pa US State Department, financia pa Gobierno Mericano, y ta conta cu sosten di IREX pa e wordo implementa.

   Riba e potret por mira e ex-becadonan di 2026, esta d.r.p.d. Nathania Engelhart di Corsou, Roxana Rodriguez di Aruba, Najhilah van Dinter di Corsou, y Ishshah Carty di St. Maarten.