Hoben di 16 aña fayece despues di incidente di tiramento na parkeerplaats di Stadion Nadi Croes

ORANJESTAD (AAN):  Un hoben di 16 aña na un manera tragico y sin sentido a perde su bida diaranson anochi despues di

un incidente di tiramento na parkeerplaats di Stadion Nadi Croes/Crismo Angela na Rooi Bosal.

Algun minuut prome cu 10:00 di anochi, Polis y 911 a ricibi informacion cu un persona a wordo tira na e area. Na yegada di e servicionan di emergencia, ambulance tabata caba presente na e sitio y paramediconan a cuminsa mesora cu maniobranan di resucitacion (CPR), indicando cu e victima tabata den un condicion critico.

Segun informacion di Polis, e incidente a envolvi un hoben di 16 aña. Un brommer y un helm a keda na e sitio, pero no a wordo confirma si nan ta pertenece na e victima.

Durante e investigacion inicial, polis a papia cu algun habitante di e bario pa determina si nan a tende e tiro, pero segun nan declaracion, niun persona a scucha e zonido.

Na un area den tera na banda di pazuid, polis tambe a haya un cadena di oro di hende homber. Te ainda no ta cla si e hayazgo aki tin relacion cu e incidente.

Slachtofferhulp a wordo manda na Hospital y famia di e victima a wordo notifica.

Mas laat, Cuerpo Policial Aruba a confirma cu e hoben a fayece. E fayecido ta Rayshon E. Kelly, naci na Aruba riba 1 di october di 2009, di 16 aña.

-Ultimo update

Diahuebs poco despues di 12'or, vocero di KPA, señora Liliana Rasmijn a informa cu team di recherche di Santa Cruz, cu a traha incansablemente y a pone man riba tres sospechoso relaciona cu e caso di tiramento na Stadion Nadi Croes/ Crismo Angela. 

Ta trata di e dos hende homber cu ta ; W.R.D.T, naci na Aruba di 23 aña y A.K.M. naci na Aruba di 32 aña y muher J.M.L.G. naci na Aruba di 31 aña. 

E vocero a agrega cu nan no ta descarta cu lo tin mas detencion pa cu e caso aki. 

DIARIO y Cuerpo Policial Aruba a expresa palabranan di condolencia na famia di e fayecido.

E caso ta bou di investigacion. Polis ta haci un apelacion na tur persona cu tin informacion of cu a mira algo relaciona cu e incidente pa contacta e tiplijn di Polis na 11141. E informacion por wordo entrega anonimamente.