Hues a ordena mas investigacion den caso di chauffeur cu a dal turista mata cu auto y core bay

E kier mas informacion promer cu e por dicta sentencia

• Caso di accident fatal na Pos Abao 

ORANJESTAD (AAN): Tabata riba un Diasabra anochi dia 27 di December, poco despues di 7:50 pm, cu yamadanan urgente a cuminza drenta na Central di Polis, pa indica cu auto a caba di dal dos peaton femenino den Caya Musica na Pos Abao, riba e caminda direccion panort pa Bubali.

   Mesora a despacha unidad di Polis di Noord, como tambe di Oranjestad y Santa Cruz pa e lugar di desgracia, y notifica Centro di Alarma cu a cuminza manda 2 unidad di Ambulance pa e area.  E prome unidad di Polis cu a yega, a bin nota cu berdad den Caya Musica, riba e pida cu ta move di Pos Abao bay nort pa Bubali, tin dos dama turista benta abao na suela, parti pariba di caminda.  Esaki ta e area unda yerbanan ta yega cerca di caminda.  A resulta cu un  vehiculo Pickup a dal nan, zwaai ambos dama turista pariba di caminda.  Despues a djis sigui core, pues el a bira un caso di Hit & Run.

   Pa colmo ta e mesun atardi ey e dos turistanan aki (mama y yiu muhe) a yega Aruba, y nan a subi caya pa bay Supermarket pa cumpra algun provision.  E mama Lisa M. Barnett a haya golpinan severo na cabez, y a keda den Intensive Care Unit interna te ora cu el a fayece dia 13 di Januari 2026.  E potret aki ta di e yiu muhe Michelle Rodriguez y su mama Lisa Barnett, e mainta ey ora cu nan tabata abordando avion pa bin Aruba.

   Como 10 dia despues, Polisnan a logra gara e chauffeur y a detene.  E caso recien a wordo atendi den Corte, y a stipula e fecha di 3 di Juli 2026 pa e ricibi su sentencia.

   Sentencia no a sigui: Pero riba Diabierna mainta, Hues no a dicta sentencia den e caso penal contra e homber Colombiano O.D.P. di 36 aña, kende ta wordo acusa cu dia 27 December 2025 a dal dos peaton turista cu auto y core bay. E consecuencia di e accidente aki ta, cu e dama Lisa Marie Barnett naci dia 26 October 1968 (57 aña di edad) naci na Merca a fayece.

   Hues a bisa cu e kier haya mas informacion pa por dicidi riba e acusacionnan. Tratamento di e caso a tuma lugar 12 Juni 2026, caminda Fiscal a acusa O.D.P. di morto door di culpa. Fiscal a acusa O.D.P. di tabata core auto bou influencia di alcohol, no a paga tino riba caminda, a core sin luz y a core cu tinted windows scur. Esaki a causa cu el a dal e dos personanan cu tabata cana riba caminda y despues a core bay.

   Via video conference for di Merca, e yiu muhe di e victima, Michelle Rodriguez tabata scucha Hues.

   Ta asina cu dia 12 Juni, Fiscal a bisa cu O.D.P. mester biba cu el a kita bida di un hende. Fiscal a exigi 3 aña di prizon y 4 aña sin rijbewijs. Fiscal a bisa cu e smartphone lo debolbe na O.D.P. pero e auto mester keda confisca.

   Hues kier mas investigacion: Diabierna mainta Hues a bisa cu e no a yega na un conclusion ainda. El a mustra cu e acusacion ta morto door di culpa. Hues a bisa cu kier mas informacion pa asina por dicidi si O.D.P. ta culpabel di e acusacionnan.

   Hues a mustra cu no tin informacion kico tabata e causa di morto di e dama Barnett, kende dos siman despues di e accidente, 13 Januari 2026 a fayece.

   Mester scucha e otro victima: Tambe Hues kier sa kico ta e motibo di e accidente. Hues a mustra cu e acusacion ta mustra cu  O.D.P. no a mira e dos turistanan pero den Corte O.D.P. a bisa cu el a mira nan. Hues kier pa scucha e yiu di victima Barnett, esta e dama Michelle Rodriguez.

   Hues a bisa cu e ta instrui Hues Comisario pa scucha e dama Michelle Rodriguez. Hues a instrui Fiscal pa haya e informacionnan di causa di morto di e dama Barnett.

   Acusado ta keda den prizon: Na opinion di Hues, ainda e no por tuma decision si O.D.P. por wordo laga liber. Hues a bisa cu tin motibo di peso. Esey ta haci cu O.D.P. ta keda encarcela te ora cu tin un sentencia. Hues a bisa cu dentro di 4 luna lo por ta cla.

   Tur cos ta depende con liher por scucha e yiu muhe Michelle Rodriguez. Unavez cu Hues haya e informacionnan cu el a ordena, e lo por tuma un decision.