Dos homber condena na 1 aña y 1½ aña di prizon pa posesion di arma

Caso den Corte

ORANJESTAD (AAN): E hombernan R.H.T. di apenas 19 aña di edad, y e Colombiano biba na Aruba R.B.V. di 29 aña, a wordo haya culpabel di posesion di arma di candela, mientras cu R.H.T. ta wordo haya culpabel di menaza hende cu arma. Fiscal a exigi castigo pisa pa nan pero Hues ta haya cu tin partinan cu nan a keda proba y pesey a baha e castigo.

   E acusacionnan ta cu entre 1 November 2025 y Februari 2026 nan tabatin posesion di armanan. R.H.T. tambe ta wordo acusa cu riba e anochi di 23 – 24 Januari 2026, el a menaza homber cu arma na De Olde Molen. R.B.V. lo tabata problema na De Molen na Februari 2026.

   Menaza cu arma: Hues a bisa cu tin masha hopi documento di e caso. Ariba e anochi di 23 pa 24 Januari 2026, R.H.T. lo a menaza hende cu arma. R.H.T. a bisa Hues cu e homber S.H. a bay busca problema y a menace. Segun R.H.T., e ora ey el a menaza S.H. cu un arma airsoft. Hues a bisa cu e homber S.H. a bisa cu e conoce R.B.V. y tabatin discusion cu R.H.T.

   Segun S.H., R.H.T. a los 2 tiro riba dje. R.H.T. a nenga esey. Hues a bisa cu tin imagen di video di siguridad caminda ta mira R.H.T. ta manera coy un arma ora cu S.H. tabata cana bay riba dje. Segun R.H.T., S.H. a bis’e cu e tambe tin arma di candela. R.H.T. a bisa Hues cu el a sinti’e den un situacion fastioso y a saca e pistol di airsoft.

   Acusado no kier papia: Hues a puntra pakico R.H.T. tabata cana cu un arma tipo “airsoft gun”. R.H.T. a bisa cu e no ta bisa nada. Hues a puntr’e con a yega na e arma y R.H.T. no kier bisa nada. Hues a bisa R.H.T. cu si e no duna contestanan, e ta crea e situacion pa Hues haya su mesun opinion. Hues a mustra cu e ora ey e por pensa cu no ta un “airsoft gun” sino un arma di berdad. R.H.T. a keda para riba cu e no ta bisa nada.

   Hues a mustra cu R.B.V. a bisa cu el a mira discusion y cu R.H.T. tabatin un pistol “airsoft” cu el a haya patras di e club nocturno di Kalibra. Ta asina cu R.H.T. a bisa Polis cu el a haya e pistool “airsoft”.

  Hues a mustra cu R.B.V. tambe tabatin un situacion na De Olde Molen. Hues a puntra R.B.V. kico a sosode. R.B.V. a declara na Polis cu el a topa cu su ex amiga cu tabata cu un otro homber M.J. Na dado momento R.B.V. tabata cu un Jamaiquino cu a bay na un truck di cuminda y a bisa e homber “you are dead”.

   Ta asina cu R.B.V. a bisa Hues cu M.J. a bin molestia y na dado momento R.B.V. lo a pone man na heup y M.J. a cana bay. Segun R.B.V. el a subi su carson. Hues a bisa cu tin combersacion scucha di R.B.V. cu un dama caminda tin e impresion cu R.B.V. ta bisa cu el a pone su man riba su arma na su heup. Segun R.B.V. e tabata burachi e dia ey y a djis papia pa papia.

   Smartphone cu potretnan di arma: Hues a mustra cu den smartphone di R.B.V. y R.H.T. a haya potretnan di arma di candela. Hues a mustra cu 11 Januari 2026 ta mira R.B.V. cu un renchi di oro y cu un arma. Despues ta mira cu R.B.V. ta mishi cu e arma. Segun R.B.V. ta un pistool “airsoft”. Tambe tin un video cu R.B.V. ta den un auto y tabatin un revolver.

   R.B.V. a admiti cu esey tabata un revolver di berdad. Segun S.B.V. el a haya e revolver den un drum di sushi. Hues a remarca cu den ultimo casonan cu a trata na Corte relaciona cu arma, ta un revolver Caliber 38 ta haya benta abao den vecindario di San Nicolas. Hues a puntra R.B.V., kico tabata su intension cu e revolver, si e kier a mustra tof, menaza of tira hende. R.B.V. no a contesta.

   Hues a mustra cu den smartphone di R.H.T. ta mira R.H.T. ta apunta un pistool riba e smartphone. R.H.T. no kier a bisa nada. Hues a mustra cu na Polis, R.H.T. a admiti cu e pistool ta di berdad. 

   Acusadonan no kier papia: Hues a remarca cu pa tanto R.B.V. y R.H.T. esaki ta preocupante. Hues a mustra cu na Aruba tin casonan di tiramento ta sosode. E ta puntra su mes pakico nan tabatin arma di candela den nan poder. Ta asina cu tanto R.B.V. como R.H.T. no kier bisa nada.

   Hues a sigui bisa cu tin un otro video caminda R.B.V. y R.H.T. ta sinta banda di otro y un revolver banda di nan. Tambe tin un video di R.B.V. drumi riba cama y na cabes di e cama tin un pistool cu un peña. Esaki tabata 17 Januari 2026. Segun R.B.V. e no sa.

Hues tambe mustra cu tin mensahe di R.H.T. cu un hende caminda R.H.T. ta pidi 6500 Florin pa un pistool 9 mm. Tin potret di esaki. Despues tin un mensahe di un revolver 38 caminda e ta pidi 5000 Florin. Hues a puntra R.H.T. si e tabata bende arma. R.H.T. no kier bisa nada. Hues a bisa R.H.T. cu door cu e no kier bisa nada, cu e chens tey cu Hues ta bay interpreta esaki como bendemento di arma.

   Hues a mustra cu tambe tin combersacion di R.B.V. cu un homber. E homber ta pidi pa un “toy” pa tira. R.B.V. lo a bisa cu e tin un revolver 38 pero sin bala pa 1800 Florin. Hues a puntra R.B.V. riba esaki y el a bisa cu e ta haci uso di su derecho di keda keto.

   Hues a mustra cu na 2023, R.B.V. tabata encarcela pa mesun tipo di asunto di arma di candela.

FISCAL A EXIGI CASTIGO PISA

Fiscal a bisa Hues cu e ta haya legalmente proba cu R.H.T. y R.B.V. tabatin arma den posecion. Fiscal a mustra cu den smartphone di R.B.V. a haya masha hopi potret, video y stemnan cu ta mustra riba posecion di arma. R.B.V. a admiti cu tin algun di e videonan tabatin arma di berdad. Fiscal ta haya R.H.T. y R.B.V. culpabel di posecion di arma di candela.

   Fiscal a sigui bisa cu R.H.T. a menaza S.H. cu un arma na The Molen. Fiscal a mustra cu por mira esaki riba camera di siguridad ariba e anochi di 23 pa 24 Januari 2026.

Fiscal a bisa cu ambos sospechoso tabatin arma riba caminda publico y tambe na cas. Fiscal a bisa cu arma ta sumamente peligroso. Hende tin arma sea pa menaza of mata. Fiscal ta haya cu R.H.T. tabata negosha den venta di arma. Fiscal a mustra cu R.B.V. tabata busca arma pa por tira riba hende. Fiscal a mustra cu na Aruba tabatin tiramento caminda hende a muri. El a mustra cu ultimo tabatin un mucha di 17 aña cu a wordo tira mata. Na opinion di Fiscal, esaki ta afecta nos turismo. El a bisa Hues cu Ministerio Publico ta baha cu man duro contra arma di candela. Ministerio Publico tin maneho stipula: posecion di arma na cas ta 9 luna di prizon di cual 3 luna ta condicional. Posecion di arma den publico, e castigo ta 21 luna di prizon di cual 6 luna ta condicional. Fiscal a enfatisa cu e castigo ta pa un arma. Den caso di R.H.T. y R.B.V. ta trata di diferente arma y na diferente lugar. El a mustra tambe cu R.B.V. ya tin castigo pa arma.

   Fiscal a exigi pa R.B.V. 3 aña di prizon. Pa R.H.T., Fiscal a bisa cu R.H.T. ta jong y cu ta promer biaha e ta cay sera. Fiscal a exigi 36 luna di prizon di cual 6 luna ta condicional cu 3 aña di prueba. Fiscal a exigi tambe pa e smartphonenan di R.B.V. y R.H.T. keda confisca y e joyas di oro por wordo debolbe na R.B.V.

DEFENSA ABOGADO

Mr. Kuster di R.H.T. a bisa Hues cu tur cos ta un hecho. E abogado a mustra cu e tempo ey R.H.T. tabatin 18 aña y a haci un movecion malo. El a menaza hende cu un arma “airsoft” cu ta wordo considera como un arma di candela. E abogado a mustra cu R.H.T. ta hoben y por drecha su bida. E abogado a bisa Hues cu e mayornan di R.H.T. a mustra cu a inscribi R.H.T. pa bay school. E abogado a bisa cu un castigo largo, lo perhudica R.H.T. E abogado a bisa Hues cu e ta kere den un castigo combina cu un tempo condicional largo lo pone presion riba R.H.T. pa e sigui e caminda drechi.

   Mr. Canwood di R.B.V. a bisa Hues cu e tin preguntanan. No a haya R.B.V. cu arma. E abogado a bisa Hues cu e tin problema cu e maneho di Ministerio Publico cu ta bisa cu no ta persigui ora ta entrega arma, pero si haya potret di arma riba smartphone, ta persigui e persona. E abogado ta haya cu si tin un campaña bon, no ta husto cu si haya potret di arma den smartphone ta persigui hende. E abogado a bisa Hues cu e no ta di acuerdo pa hende tin arma di candela y tampoco “airsoft”. E potret di R.B.V. cu arma na cabez di cama, no tin ningun indicacion cu ta un arma real. Tin video di otro hende cu stapel di placa y arma pero no ta di R.B.V.  E abogado a mustra cu e combersacionnan tocante cumpra arma, no por bisa cu el a haya arma. E tabata busca arma pasobra el a wordo amenaza. E abogado ta haya cu por duna R.B.V. un chens pa drecha su bida. El a bisa cu R.B.V. tin un trabao y e castigo ta pone cu e ta perde su trabao. E abogado a pidi Hues pa duna castigo combina.

SENTENCIA

Hues a pospone e caso un rato pa evalua y despues a dicta sentencia. Hues a bisa cu riba e anochi di 23 pa 24 Januari 2026, R.H.T. na The Molen lo a menaza cu arma. Hues ta bisa cu no por bisa si ta un arma real. El a mustra cu R.H.T. ta bisa cu ta un “airsoft”. Hues ta haya cu esaki ta un menaza. 

Pa loke ta posecion di arma, tin hopi indicacionnan cu nan tabatin algo cu parce arma di candela. Hues a declara R.B.V. liber di e incidente na The Molen cu lo a menaza e homber J. cu un arma.

POSECION DI ARMA

   Pa loke ta imagennan di video y potret, Hues ta haya cu R.H.T. na Januari 2026, tabata ocupa riba smartphone pa bende un arma di candela. Tambe cu R.H.T. a menaza riba e anochi di 23 pa 24 Januari 2026, un hende cu arma. E otronan potretnan, na opinion di Hues, no por bisa si ta realmente arma.

   Pa loke ta R.B.V., 30 Januari 2026 ta mir’e cu algo parecido di arma di candela. Ariba cama drumi, na e cabez di cama ta mira un pistool cu un peña. Ademas tin combersacionnan caminda R.B.V. tabata papia di arma. Esaki entre 17 y 27 Januari 2026. Hues a bisa cu esakinan ta asuntonan serio. Armanan di candela ta sumamente peligroso. El a mustra cu na Aruba tin problemanan di gang. Constantemente ta scucha di armanan caliber 38. Hues a mustra cu recien tin un hoben asesina. Na opinion di Hues, door di tin arma di candela, R.H.T. y R.B.V. ta daña nan bida. Hues a remarca cu e acusadonan no kier bisa pakico tin arma. Esaki ta crea un preocupacion.

CASTIGO

   Hues a bisa cu R.H.T. no solamente tabatin arma sino a menaza tambe y tambe tabata bende. Hues a bisa cu e ta tene cuenta cu R.H.T. ta hoben y cu mester dun’e chens pa dicidi kico lo bay haci cu su bida. Hues a condena R.H.T. na 12 luna di prizon di cual 6 luna ta condicional cu 3 aña di prueba. Hues a splica cu esey ta nifica cu na Augustus 2026 R.H.T. ta sali liber y por bay school manera su mayornan a haci. Hues a hala R.H.T. su atencion cu esaki ta un chens y si e faya den e 3 añanan di prueba, e lo bay sera atrobe.

Hues a condena R.B.V. na 16 luna di prizon di cual 6 luna ta condicional cu 3 aña di prueba. Hues a mustra cu anterior caba R.B.V. a wordo condena pa arma. Hues a confirma e beslagnan cu Fiscal a bisa riba e smartphonenan.