Falta di formacion di polis den pasado ta causa presion riba Cuerpo Policial

Ministro Dowers:

• Bao Gobierno di MEP ta menos hende a bira Polis
• Culpa cu den pasado no a percura pa suficiente aspirant 

ORANJESTAD (AAN): Minister di Husticia, mr. drs. Arthur Dowers, a expresa su preocupacion relaciona cu e escasez di personal cu Cuerpo Policial Aruba ta enfrentando. Minister Dowers a enfatisa cu e situacion actual no a surgi di un dia pa otro, pero ta consecuencia di añanan di falta di continuidad den formacion y reclutamento di funcionario policial.

   Minister Dowers a lamenta profundamente e incidente y a extende su condolencia na famia di e victima y na mes momento a indica cu KPA y Ministerio Publico ta trahando intensivamente riba e investigacion.

   E mandatario a enfatisa cu ningun circunstancia por hustifica un acto di violencia asina. Siguridad di comunidad ta un responsabilidad fundamental di Gobierno. E escasez di personal no ta un hustificacion pa loke a sosode, pero un realidad structural cu ta afecta capacidad operacional di polis y cu mester haya un solucion sostenibel.

   Falta di continuidad den formacion policial: Segun Minister Dowers, durante varios aña, bao di responsabilidad di Minister di Husticia di e gabinete anterior, no a percura pa klasnan nobo di Scol di Polis y nombramento di suficiente funcionario policial.

   Actualmente, segun e minister, KPA tin aproximadamente 80 polis menos compara cu 2017, tempo cu el a traspasa responsabilidad di e cartera di Husticia na e minister di Gabinete Wever-Croes I.

   Formacion di un funcionario policial ta exigi tempo, inversion y preparacion. Ora durante varios aña no a percura pa suficiente entrada di personal nobo, mientras cu otro funcionario ta retira of bandona e organizacion, e consecuencia ta un escasez cu no por soluciona di un dia pa otro.

   E minister a recorda cu na 2009, ora el a asumi responsabilidad pa e cartera di Husticia, Aruba tabata enfrenta un situacion similar. Durante e periodo ey, segun Dowers, a dedica atencion particular na formacion y nombramento di polis nobo pa fortalece capacidad di e organizacion. Awo desde cu Minister Dowers a bolbe tuma e responsabilidad di Husticia, tin varios klas nobo di formacion policial canando y ta haciendo inversion cuantioso den mehora e scol di polis.

   E scarsedad di polis:  Cu menos personal disponibel, polisnan mester cubri mas servicio y traha cantidad excesivo di ora extra frecuentemente cu oportunidad limita pa descanso.

   Minister Dowers a expresa su aprecio pa e dedicacion di e funcionarionan policial, cu a pesar di e limitacionnan existente ta sigui cumpli cu nan responsabilidad. Sin embargo, el a enfatisa cu un organizacion policial no por depende indefinidamente di ora extra y sacrificio di su personal pa mantene su nivel di servicio.

   Fortalecemento di capacidad y instrumento legal: E escasez ta obliga Cuerpo Policial Aruba pa distribui su recursonan di manera strategico. Aumenta presencia policial den cierto areanan ta implica mobilisacion di personal adicional y frecuentemente mas ora extra.

   Minister Dowers a señala cu, independientemente di e causa historico di e escasez, ta responsabilidad di Gobierno pa atende e situacion actual y fortalece capacidad operacional di KPA.

   Den e contexto aki, e minister a anuncia su intencion di presenta na Parlamento un proyecto di ley prepara aproximadamente diez aña pasa, cu ta enfoca riba proteccion di comunidad y posibilidadnan di intervencion preventivo den situacionnan cu ta representa un riesgo pa orden publico y siguridad, dentro di un cuadro legal cu ta respeta derechonan fundamental.

   Continuidad den maneho di siguridad: Minister Dowers a haci un yamada na comunidad pa fortalece e control social den nos bario y vecindarionan. Minister a enfatisa cu siguridad ta un responsabilidad comparti, unda cada ciudadano por contribui door di ta atento na loke ta sosode den su bario, mantene contacto cu su bisiñanan y informa autoridadnan competente ora observa situacionnan sospechoso of comportacion cu por pone siguridad di comunidad na riesgo.

   Den e contexto aki, Minister Dowers a subraya cu e lucha contra criminalidad ta exigi un enfoke integral, cu ta inclui suficiente capacidad policial, instrumento legal adecuado, educacion, prevencion, desaroyo social y participacion activo di comunidad. Pa e motibo aki, e minister ta considera esencial pa atende e escasez di personal na su raiz, sigui inverti den formacion di polis nobo y garantisa condicionnan di trabao adecuado pa e funcionarionan policial.

   Siguridad no ta un privilegio, pero un derecho di cada ciudadano. Pa e motibo aki, nos ta sigui traha cu determinacion, responsabilidad y un vision di largo plazo pa un Aruba unda cada ciudadano por biba, traha y forma un famia den un ambiente sigur.