Cu speed di jet mes Polisnan a logra gara sospechosonan di atraco

Bon trabao di Polisnan Uniforma

• Dialuna anochi cu yen accion den Noord 

ORANJESTAD (AAN): Un anochi unda Polisnan a uza nan conocemento di caya, sa di e skinanan unda hendenan problematico ta circula, y cu yudanza di agentenan ‘bakia’ den investigacion y movimento criminal, ta con por describi e accion di Dialuna anochi riba cayanan di Aruba.

   Tur cos a cuminza Dialuna pa 9:45 pm, ora cu Central di Polis a ricibi yamada urgente, indicando cu un atraco arma a caba di socede, specificamente den Caya Calco na Palm Beach.  Esaki ta e caya cu tin poco pazuid di Yen Yen Bar & Restaurant, na e T-weg bay pabao rumbo pa Hotelnan.

   Aunke e atraco a socede den Caya Calco, e yamada pa yudansa a drenta for di un cas na Pos Abao.  Esey ta debi cu e victimanan a move for di Caya Calco, na un distancia di como 3½ kilometer yega pazuid te na un cas na Pos Abao.  Aki e habitantenan a bati alarma y pidi yudansa di Polis.

   Herida na cabez: Un patruya di Polis cu urgencia a acudi na e cas na Pos Abao, y na e adres a bin topa cu e dos victimanan di e atraco, y nan ta dos persona masculino.  Uno di nan tabatin sanger ta bashando for di su cuero di cabez.

   Mesora nan a declara na Polis, cu berdad un rato prome na Caya Calco nan a wordo atraca pa un grupo di 5 hende homber cu tabata moviendo den un auto compacto Honda Fit color preto.  Nan a splica cu e grupo di 5 atracador a trata na bay cu un Mitsubishi Minivan color blanco ey na Caya Calco. Pero ta parce cu e atracadornan ta hopi bruha y nan no a logra.  E dos victimanan a duna un descripcion hopi extenso di e Honda Fit aki.  E informacion ey a wordo pasa pa tur unidad riba caya.

   Polis mientras tanto a manda pidi presencia di Ambulance pa atende e victima cu tin cabez ta sangra.  Esey ta debi cu un di e atracadornan tabatin un arma di candela, y e otro un cuchiu den man.  E atraco a bira uno violento, ora cu un atracador a zwaai y maltrata e victima cu e cabo di e arma di candela.

   Ambulance a presenta na Pos Abao, y mesora Paramediconan a pone verband rond di su cabez pa stop e sangramento, y despues di a duna declaracion na Polis, nan a transport’e pa Hospital pa ricibi asistencia medico avansa.

   Central di Polis mientras tanto a pone Atraco Team na altura, y tambe a yama Bureau Slachtofferhulp pa bay duna un man.

   Movimento den Sero Pela: Patruyanan di Polis mientras tanto a keda core den tur “skina di custumber” enbusca di cualkier pista.  Un rato despues, un patruya atento di Polis cu ta moviendo riba caya, na forma sorpresivo a topa cu un Honda Fit cu ta cuadra cu loke e victimanan di atraco a señala.  E Honda Fit aki tabata na Sero Pela cu ta como 2,2 km leu for di e lugar di crimen na Caya Calco.

   E vehiculo Honda Fit a trata na huy, y durante esaki un di e portanan a dal habri, y un sospechoso a dicidi cu e no ta sigui core mas den e auto, y a cuminza core bay na pia.  Polisnan mesora a avisa via Tetra-Radio loke nan a topa cu ne, y a avisa cu nan ta bay tras di e persona cu a ranca careda na pia.   Polisnan a demostra cu nan condicion fisico ta hopi miho cu e atracador aki, y a logra gar’e, detene, y pone boei na su man.

   Ora cu nan a listr’e, na su curpa a bin haya varios tipo di droga den su saco di carson y camisa.  Polis no a divulga su edad, pero si cu el a keda deteni.  A manda busca Vehiculo di Transporte pa bay cu ne.

   Mobilizacion masal: Mientras tanto e Honda Fit a logra huy, pero unidadnan di Polis a aglomera den tur area di Noord, e.o. Kamay, Boroncana, Bakval, Monserat, y Turibana.

   Nan a bin topa cu e Honda Fit ta moviendo den Turibana, y aki a bin realiza cu e chauffeur tambe ta un criminal sin experiencia, pasobra el a slip cu e auto, subi acera y hera dal den bakinan di beton y un palo di kwihi, pero a bay dal contra un cura di cas.  Polisnan a aglomera mesora rond di nan, y a detene e sospechosonan den e auto.

   E atracadornan mas estupido di 2026 a haya nan ta entrega nan mes, realizando cu nan idea di dal un atraco tabata esun di mas dificil cu nan por a hinca den nan cabez.  Vocero di Polis a confirma cu tur e sospechosonan a wordo deteni, aunke no a duna informacion di nan edad.  E auto kibra Honda Fit a wordo seya, y esaki tambe a wordo confisca.  Team Forensico di BFTO ta encarga pa documenta tur prueba cu wordo haya.

   Un fenomenal trabao di Polis!  Nan ta defende pueblo y ta lucha pa stop cu criminalidad.  Vocero di Polis ta pidi comunidad, cu por a mira algo, of sa di algo di e crimen aki di Dialuna anochi, pa yama e Tipline di Polis cu ta 111-41.  Corda cu nan ta garantiza cu bo ta keda anonimo.