Cuido medico ta sufriendo debi na decisionnan di directiva di AZV y Minister di Salubridad

Hospital cu mensahe cla y raspa

• Nan suplica no ta hayando oido di AZV 

ORANJETSAD (AAN): Diabierna atardi, Dr. Horacio Oduber Hospital a emiti un boletin cu a laga varios instancia keda tembla so riba e isla.  E biaha aki no ta e Sindicato di Enfermeronan, sino ta for di Hospital mes e mensahe a bin.

   Loke nan a enfatiza di dje, cu e peticion cu Hospital HOH a haci na Hunta di Comisario di UOAZV pa ayudo, no ta haya oido di directiva di UOAZV.

   Diabierna mainta a ricibi na Horacio Oduber Hospital miembronan di Hunta di Comisario di UOAZV, sr. Detlef Hooyboer, sr. Mike Wouters y tambe sr. Frank Dennert. Presente durante e mainta aki pa representa HOH tabatey Hunta di Directiva di HOH sr. Jacco Vroegop y sr. Gregory Croeze y tambe sr. Jossy Figaroa y sr. Pieter Geersing di HOH su Hunta di Supervision.

    Un reunion unda den forma sumamente transparente a intercambia informacion extenso tocante e situacion actual cu HOH ta pasando aden cu tin consecuencianan grandi pa e calidad di cuido. HOH a splica detayadamente di e combersacionnan cu ta andando cu directiva di UOAZV y tambe Minister di Salubridad desde luna di maart 2026 y awe 7 luna despues lamentablemente ainda no a logra yega na un solucion definitivo.

   Alavez HOH a informa Hunta di Comisario di UOAZV cu si acaso nada no sosode den e siguiente dos simannan e listanan di espera lo bay subi mas ainda y tambe lo mira e efecto pashentnan cu tin un oepracion of tratamento planea, manera un operacion di rudia, heup, lies y mas.

   Tur documento entrega: Hunta di Comisario di UOAZV ta na altura cu durante e lunanan cu a pasa HOH a entrega tur documentacion necesario na directiva di UOAZV. Algun luna pasa UOAZV a pidi un compania externo pa haci un investigacion y e rapport aki a ser entrega na UOAZV, pero lamentablemente awo esaki tampoco no ta suficiente pa por yega na un solucion deifinitivo.

   Pa asina e Hunta di Comisario haya un miho bista di HOH y su facilidadnan a hiba nan pa wak e estado di Clinica di Dialisis cu mester muda pa un localidad nobo y Minisiter di salubridad ni UOAZV no ta mira e urgencia den esaki. Di biaha a sigui pa nan a conoce e localidad nobo di HOH su camber hiperbarico (HBOT) cu ainda no ta wordo cubri pa UOAZV.

   Siguientemente a pasa departamento di Radiologia y tambe HOH su cushina cu den un futuro cercano lo mester wordo renoba of lo mester muda pa un otro localidad. A subi bay piso 5 di e edificio biew cu ainda ta bashi y tur plan ta cla pa e wordo renoba pa un ‘state of the art’ Centro di dialisis pero no a logra yega na un acuerdo pa cu esaki ainda. Despues a pasa Camber di operacion sigui pa Cuido intensivo.

   Un recorido sumamente extenso, unda berdaderamente por a mira e interes halto y comprension di e miembronan di Hunta di Comisario di UOAZV pa cu e necesidadnan di HOH y tambe e sin lubida e espacio cu a bira dos biaha mas grandi y asina mes e lumpsum cu ta ricibi di UOAZV no a crece pa por cubri tur e espacio cu a bin extra.

   A termina e recorido aki cu un combersacion unda nan a sigura HOH cu nan ta compronde e posicion di HOH completamente y alavez ta spera cu directiva di UOAZV y Minsiter di Salubridad pronto por tuma un decision cu ta beneficia nos pashentnan di Aruba y cu no lo tin consecuencia lamentable pa e salubridad di comunidad.