A cuminza explora oportunidadnan di cooperacion comercial entre Aruba y Venezuela

Ministro Geoffrey Wever:

ORANJESTAD (AAN): Minister di Finansa, Asunto Economico y Sector Primario, mr. Geoffrey Wever, a reuni cu señora Beatrize Blanco, representante di Fedecámaras Venezuela pa intercambia di idea riba oportunidadnan pa fortalece e relacion comercial entre Aruba y Venezuela, hunto cu Presidente di San Nicolas Business Association (SNBA) Sr. Errol de Freitas.

   Durante e encuentro, señora Blanco a presenta un concepto pa desaroya un corredor comercial cu por conecta empresarionan y productornan Venezolano cu e mercado Arubiano y eventualmente, cu otro mercadonan den Caribe. Dentro di e concepto aki, Aruba por hunga un rol como centro di logistico, plataforma pa exhibicion, distribucion y reexportacion di productonan.

   Señora Blanco a enfatisa cu e stabilidad huridico y politico di Aruba como un factor importante pa comerciante cu ta busca pa amplia nan actividadnan comercial. Entre e oportunidadnan cu a dialoga tocante di dje tabata materialnan di construccion, productonan industrial, posibilidadnan pa industria di luz, paketamento y armamento na Aruba.

Minister Wever a expresa su interes den e iniciativa y su disposicion pa sigui explora e posibilidadnan di cooperacion. Durante e intercambio a pone enfasis riba e importancia di duna e ideanan un forma mas concreto, teniendo cuenta cu e interes di comerciante y e oportunidadnan cu e mercado ta ofrece.

   E dialoga aki por forma un base pa desaroya e cooperacion gradualmente, cu espacio pa mas companianan participa segun cu e iniciativa ta desaroya y ta genera resultadonan positivo.

   Den e reunion tambe a trata e importancia di bon coordinacion entre e sector comercial y e diferente instancianan publico. Asuntonan relaciona cu transporte, aduana, free zone, rekesito sanitario y sistema di pago mester wordo evalua a base di e actividadnan proponi y e reglanan aplicabel.

   E conversacion ta ofrece un prome paso pa sigui explora con cooperacion entre Aruba y Venezuela por contribui na mas actividad economico diversifica y oportunidadnan pa comerciante di ambos  Aruba y Venezuela