The content originally appeared on:
Diario
E balor di monumento Guera Mundial 80 aña despues di D-day
*Proyecto Arubano den luz di encuentro cu veteranonan di D-day
*Aruba como refugio di Reino ora Hitler a conkista e parti Europeo
ORANJESTAD (AAN) — Si tin un persona cu a duna expresion na e balor di e teritorionan Hulandes den Caribe, tabata Reina Juliana, na momento cu pa prome bez el a bishita e islanan Hulandes den region di Caribe durante Segunda Guera Mundial.
Tabata den tempo di Segunda Guera Mundial, cu pa prome bez den historia, miembronan di Cas Real Hulandes a bishita e teritorionan den region di Caribe, cu lo a wordo confronta cu cambionan grandi.
E felicidad di por a pone pia atrobe ariba teritorio Hulandes, a wordo splica dor e tempo ainda Princesa Juliana, cu mescos cu tur otro miembro di Cas Real Hulandes, mester a huy ora Hitler a invadi Hulanda.
Aruba no solamente a bira cas pa ciudadano Hulandes cu a logra scapa di un Hulanda domina pa e teror di Hitler, pero Aruba y Curacao a wordo transforma den centro operacional pa defensa di Reino y aliadonan, cu tabata tin mester di nan material di guera pero tambe di azeta, di combustibel pa por a confronta Hitler.
Aruba di e forma aki a wordo directamente involucra den Segundo Guera Mundial y tabata tin un papel asina importante, cu submarinonan Aleman a trata na destrui Aruba.
Medidanan di guera mester a wordo tuma na Aruba, cu awe porfin ta duna atencion cu un monumento na su papel durante Segundo Guera Mundial.
E pandemia Covid-19, a hiba Aruba na un forma parcial na e realidad di guera, cu ta deshaci di tur felicidad y libertad di hende.
E realidad di Segundo Guera Mundial tabata mucho mas cruel, manera nos por a comprende ora e gran honor a toca nos como studiante, pa topa cu veteranonan di Segunda Guera Mundial cu a participa na e accionnan militar pa libera Europa Occidental for di Hitler.
E prome encuentro grandi , cu a uni veteranonan cu a participa na D-day na Francia a tuma lugar na Juni 1969 pa recorda cu 25 aña prome, a duna inicio na e liberacion di e parti West di Europa for di Hitler.
Ningun buki di historia por a splica loke ta biba cerca un veterano y familianan di veterano, cu despues a sigui cu celebracionnan pa recorda sigur cada 25 aña e momento cu liberacion di Europa for di Hitler a haya su inicio cu D-Day.
Como hoben estudiante na Hulanda nos a forma parti di recepcion oficial di veteranonan cu a participa na e simulacion di D-Day na Normandia y e conkista Hulanda for di Hitler, ora nan a alcansa e parti mas dificil di nan lucha cu tabata e parti NoordOost di Hulanda.
Veteranonan personalmente a conta nan relatonan di e invierno di hamber prome cu libertad Hulandes a bira posibel.
E hecho cu nan tabata di regreso na sitionan cu nan mester a libera, tabata tin impacto total.
Awe cu Aruba ta lanza e proyecto di un Monumento pa recorda Aruba durante Guera Mundial, nos ta bolbe mira nos dilanti e caranan di veteranonan, cu ta bolbe na e sitionan caminda nan a enfrenta morto pa alcansa libertad y cu a bira parti di nan historia.
Nos por mira miembronan di nan famia, cu a sufri pa motibo di nan entrega na nan pais.
Na Europa na 2024, ta recorda cu 80 aña pasa, aliadonan a baha na costa Europeo pa enfrenta Hitler den un guera den cual Aruba a hunga un papel sumamente importante sigur ora tene cuenta cu Hulanda tabata un parti di e totalidad di Guera Mundial.
Durante Segundo Guera Mundial, Aruba tabata parti di e teritorionan Hulandes liber den region di Caribe y como tal a comparti cu Hulanda directamente e guera contra Hitler.
Aruba a duna inicio na un proyecto sumamente interesante, cu sigur lo tin atencion na un mundo cu ta prepara pa celebra 80 aña D-day, e inicio di final di epoca di Hitler na caminda pa final di Guera Mundial den Pacifico.
